کوکرناگ تصادم:تلاشی کاآپریشن تیسرے روز بھی جاری

سرینگر//
جنوبی کشمیر کے اہلن گڈول کوکرناگ جنگل علاقے میں ملی ٹنٹوں کی تلاش کے لئے پیر کو مسلسل تیسرے روز بھی وسیع پیمانے پر تلاشی آپریشن جاری ہے ۔
بتادیں کہ کوکر ناگ کے اہلن گڈول جنگل علاقے میں ہفتے کے روز سیکورٹی فورسز اور ملی ٹینٹوں کے مابین شدید گولیوں کا تبادلہ ہوا جس کے نتیجے میں دو فوجی جوان جاں بحق جبکہ دو عام شہری بھی زخمی ہوئے جن میں سے ایک زخموں کی تاب نہ لا کر چل بسا۔
ذرائع کے مطابق کوکر ناگ کے اہلن گڈول علاقے میں آپریشن جاری ہے ۔ انہوں نے کہا کہ چونکہ اہلن گڈول کا علاقہ گھنے جنگلات پر محیط ہے جس کے پیش نظر سیکورٹی فورسز کے اہلکار آہستہ آہستہ آگے بڑھ رہے ہیں۔انہوں نے مزید بتایا کہ اضافی کمک کو جنگلی علاقے کی اور روانہ کیا گیا ہے ۔ان کامزید کہنا ہے کہ جنگلی علاقے میں ڈرون کیمروں کے ذریعے نظر گزر رکھی جارہی ہے۔
یہ انکاؤنٹر پچھلے سال ستمبر میں کوکرناگ کے علاقے میں اسی طرح کے ایک آپریشن کی یاد دلاتا ہے، جس کے دوران کرنل من پریت سنگھ، میجر آشیش اور ڈپٹی ایس پی ہمایوں بھٹ سمیت چار سیکورٹی اہلکار ملی ٹنٹوں کے ساتھ ایک ہفتے تک جاری رہنے والی لڑائی میں مارے گئے تھے۔
اس آپریشن کے دوران لشکر طیبہ (ایل ای ٹی) کے ایک سینئر کمانڈر سمیت ملی ٹنٹوںکو بھی مار گرایا گیا تھا۔