سرینگر/
فوج کی شمالی کمان کے کمانڈر‘ لیفٹیننٹ جنرل ایم وی سچھندرا کمار نے جمعہ کے روز ’آپریشن وجے‘کے دوران پاکستانی در اندزوں پر ہندوستانی فوج کی فتح کی یاد میں یادگاری ڈاک ٹکٹ اور فرسٹ ڈے کور (ایف ڈی سی) جاری کیا۔
فوج کی شمالی کمان نے جمعہ کو سماجی رابطہ گاہ ’ایکس‘پر ایک پوسٹ میں کہا’’شمالی کمان کے کمانڈر لیفٹیننٹ جنرل ایم وی سچھندرا کمار نے آپریشن وجے کے دوران پاکستانی در اندازوں پر ہندوستانی مسلح فوج کی فتح کی یاد میں یادگاری ڈاک ٹکٹ اور فرسٹ ڈے کور جاری کیا‘‘۔
کمار نے کہا’’اس ڈاک ٹکٹ میں کرگل جنگ کی یاد گار کو دکھایا گیا ہے جو آپریشن وجے کے دوران بہادر جوانوں کی جان سے دی گئی بیش بہا قربانیوں کی علامت ہے ‘‘۔
اسٹمپ کے پس منظر میں ٹولولنگ کی پر رعب پہاڑیاں ہیں جو پہاڑی جنگ کی تاریخ کی مشکل ترین لڑائیوں میں سے ایک لڑائی کی علامت ہے اور جس نے جنگ کا رخ ہندوستانی فوج کے حق میں موڑ دیا۔
بتادیںکہ۲۶جولائی کو سال۱۹۹۹میں کرگل میں پاکستانی فوج پر ہندوستانی فوج کی فتح کو کرگل وجے دیوس کے طور پر منایا جاتا ہے ۔
۱۹۹۹میں پاکستانی فوج اور مختلف تنظیموں کے ملی ٹنٹوں نے دراس سے بٹالک تک لائن آف کنٹرول پر کئی چوٹیوں پر قبضہ کیا تھا۔
بعد ازاں ہندوستانی فوج نے فضائی فوج کی مدد سے پاکستانی فوج اور در اندزوں کو پیچھے دھکیل دیا تھا اور تین ماہ کی جنگ کے بعد ان چوٹیوں پر واپس اپنا قبضہ جمایا تھا۔
