منشیات کا کار و بار‘بمنہ میں رہائشی مکان ضبط:ای ڈی

نئی دہلی//
انفورسمنٹ ڈائریکٹوریٹ (ای ڈی) نے جمعہ کو کہا کہ اس نے جموں و کشمیر میں دہشت گردانہ سرگرمیوں کی فنڈنگ کے لیے منشیات کے مبینہ کاروبار سے متعلق منی لانڈرنگ کی تحقیقات کے ایک حصے کے طور پر سرینگر کے بمنہ میں واقع ایک گھر کو ضبط کیا ہے جس کی قیمت ۵ء۱ کروڑ روپے ہے۔
انفورسمنٹ ڈائریکٹوریٹ (ای ڈی) نے ایک بیان میں کہا کہ ملزم عبدالمومن پیر کے خلاف کارروائی کی گئی ہے۔
منی لانڈرنگ کا یہ معاملہ قومی تحقیقاتی ایجنسی (این آئی اے) کی جانب سے پیر کے خلاف دائر ایف آئی آر اور چارج شیٹ سے شروع ہوا ہے۔
جموں و کشمیر پولیس نے ایک چیک پوسٹ پر چیکنگ کے دوران پیر کو چھ کلو گرام ہیروئن اور ۲۰ لاکھ روپے کی نقد رقم کے ساتھ گرفتار کیا۔ اس کے علاوہ این آئی اے نے اس کے رشتہ داروں اور ساتھیوں سے۱۵ء۱ کروڑ روپے اور۱۵ کلو گرام ہیروئن بھی ضبط کی ہے۔
ایجنسی نے الزام عائد کیا کہ پیر اپنے رشتہ داروں اسلام الحق پیر، سید افتخار اندرابی، سید سلیم اندرابی اور ساتھیوں کے ساتھ مل کر دہشت گردی کی سرگرمیوں کو آگے بڑھانے کے مقصد سے منشیات کے غیر قانونی کاروبار میں ملوث تھا۔ انہیں جموں و کشمیر پولیس نے اسی طرح کے معاملوں میں دو بار گرفتار کیا تھا۔
بیان میں کہا گیا ہے کہ سرینگر کے علاقے بمنہ میں ایک رہائشی مکان کی شناخت منشیات کے غیر قانونی کاروبار سے حاصل ہونے والے جرائم سے حاصل ہونے والی رقم کے طور پر کی گئی ہے اور یہ جائیداد ان کی اہلیہ سید صدف اندرابی کے نام پر خریدی گئی تھی۔
ایجنسی نے منی لانڈرنگ کی روک تھام کے قانون (پی ایم ایل اے) کے تحت گھر کو ضبط کرنے کا عبوری حکم جاری کیا۔ (ایجنسیاں)