بالیہ//
وزیر دفاع راج ناتھ سنگھ نے جمعہ کے روز کہا کہ پاکستان کے زیر قبضہ جموں و کشمیر ہمارا تھا، ہے اور رہے گا۔
اپوزیشن جماعتوں پر چین کے معاملے پر الجھن پھیلانے کا الزام لگاتے ہوئے انہوں نے کہا کہ ہندوستان نے کچھ نہیں کھویا ہے۔ ’’ہم ہندوستان کو کچھ بھی کھونے نہیں دیں گے۔ بات چیت جاری ہے… ہمیں یقین ہے کہ اس کا حل تلاش کر لیا جائے گا‘‘۔
بی جے پی کے سلیم پور امیدوار رویندر کشواہا کی حمایت میں بالیہ کے سکندر پور میں ایک انتخابی ریلی سے خطاب کرتے ہوئے سنگھ نے یہ بھی کہا کہ پاکستان کے زیر قبضہ جموں و کشمیر ہمارا تھا، ہمارا ہے اور ہمارا ہی رہے گا۔
سنگھ نے دعویٰ کیا کہ انتخابات کے چار مرحلوں کے بعد نہ صرف ہندوستان بلکہ دنیا بھر کے سیاسی تجزیہ کاروں کا ماننا ہے کہ بی جے پی۴۰۰ سے زیادہ نشستیں جیت کر حکومت بنانے جا رہی ہے۔
وزیر دفاع نے انڈیا بلاک کی شراکت داروں عام آدمی پارٹی، سماج وادی پارٹی اور کانگریس پر بھی حملہ کیا اور یکساں سول کوڈ نافذ کرنے کا عہد کیا۔
ان کاکہنا تھا’’ہم یکساں سول کوڈ نافذ کریں گے، یہ ہمارا عزم ہے۔ ہم کسی مذہب کے خلاف کام نہیں کرتے۔ ملک میں رہنے والا ہر شخص چاہے وہ ہندو ہو، مسلمان ہو، عیسائی ہو یا یہودی، ہمارے بھائی ہیں۔ میں یکساں سول کوڈ کی بات کر رہا ہوں کیونکہ یہ آئین کے پالیسی ساز اصولوں میں سے ایک ہے‘‘۔
اپوزیشن پارٹیوں پر اس دعوے پر حملہ کرتے ہوئے کہ مودی لوک سبھا میں ۴۰۰ نشستیں مانگ رہے ہیں تاکہ بی جے پی آئین کو بدل سکے، سنگھ نے کانگریس کے دور حکومت میں ایمرجنسی کے دور کو یاد کرتے ہوئے کہا’’آپ نے جمہوریت کا گلا گھونٹ دیا اور ہم پر الزام لگا رہے ہیں۔ جمہوریت کو کوئی ختم نہیں کر سکتا‘‘۔
وزیر دفاع نے سماج وادی پارٹی اور کانگریس پر بھی الزام عائد کیا کہ وہ بی جے پی کے خلاف جو بھی الزامات ان کے ذہن میں آتے ہیں وہ کرتے ہیں۔