بارہمولہ میں دو منشیات فروش گرفتار۔ ہیرائن جیسا مواد بر آمد:پولیس

سرینگر//
منشیات فروشوں کے خلاف وسیع پیمانے پر جنگ کو جاری رکھتے ہوئے جموں وکشمیر پولیس نے شمالی کشمیر کے ضلع بارہمولہ میں دو منشیات فروشوں کو گرفتار کرکے ان کی تحویل سے کروڑوں رویے مالیت کا ہیرائن جیسا مواد بر آمد کیا ہے ۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ پولیس اسٹیشن بونیار کی ایک ٹیم نے گنائی محلہ ترکنجن میں ایک ناکے کے دوران دو افراد کو روکا۔انہوں نے کہا کہ تلاشی کے دوران ان کی تحویل سے۴۴۶گرام ہیرائن، جس کی بازار میں قیمت قریب دو کروڑ روپے ہے ، جیسا مواد بر آمد کیا۔
بیان میں گرفتار شدہ منشیات فروشوں کی شناخت عبدالقیوم گنائی اور غلام حسن گنائی پسران غلام رسول گنائی ساکنان تر کنجن بونیار کے طور پر کی گئی ہے ۔انہوں نے کہا کہ اس سلسلے میں پولیس اسٹیشن بونیار میں متعلقہ دفعات کے تحت ایک کیس درج کرکے مزید تحقیقات شروع کی گئی۔
قابل ذکر ہے کہ بارہمولہ پولیس نے ضلع میں سال رواں کے پہلے چار مہینوں کے دوران این ڈی پی ایس ایکٹ کے تحت۷۹مقدمے درج کرکے۳۶سخت گیر منشیات فروشوں سمیت۱۴۵منشیات فروشوں کو گرفتار کیا ہے اور ان کی تحویل سے ایک کروڑ۸۸لاکھ روپے مالیت کا نشہ آور مواد بھی بر آمد کیا ہے ۔