بارہمولہ میں۲جنگجو ہینڈلروں کی غیر منقولہ جائیداد قرق:پولیس

سرینگر//
جموں وکشمیر پولیس نے شمالی کشمیر کے ضلع بارہمولہ میں۲جنگجو ہینڈلروں کی لاکھوں روپیے مالیت کی غیر منقولہ جائیدادوں کو ضبط کیا ہے ۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ سب جج اوڑی کی طرف سے اجازت حاصل کرنے کے بعد پولیس نے بارہمولہ کے اوڑی علاقے میں پاکستان میں مقیم دو دہشت گرد ہینڈلروں کی لاکھوں روپیے مالیت کی غیر منقولہ جائیدادوں (ایک کنال اور ۱۱مرلہ اراضی) کو ضبط کیا ہے ۔
ترجمان نے دہشت گرد ہینڈلروں کی شناخت محمد عارف بادل ولد غلام حسین سالن نوا رندہ اور محمد بشیر ولد محمد عالم ساکن گوہالن اوڑی کے طور پر کی ہے ۔
پولیس ترجمان نے بتایا کہ یہ کارروائی سی آر پی سی کے سیکش۸۳کے تحت انجام دی گئی اور اس سلسلے میں پولیس اسٹیشن اوڑی میں متعلقہ دفعات کے تحت ایک ایف آئی آر درج ہے ۔
ترجمان نے کہا کہ پولیس کی طرف سے کی گئی تحقیقات کے دوران ان جائیدادوں کی شناخت دہشت گرد ہینڈلروں کی جائیدادوں کے طور پر ہوئی۔