’سرینگر لوک سبھا سیٹ پر اچھی پولنگ ہوئی‘

سرینگر//
پی ڈی پی کی صدر اور سابق وزیر اعلیٰ محبوبہ مفتی کا کہنا ہے کہ سری نگر لوک سبھا سیٹ پر اچھی پولنگ ہوئی کیونکہ یہاں گذشتہ پانچ برسوں سے لوگوں کا دم گٹھ رہا ہے ۔
محبوبہ نے کہا کہ ووٹنگ کے ذریعے لوگ دلی کو یہ پیغام دینا چاہتے ہیں کہ وہ سال۲۰۱۹میں لئے گئے حکومتی فیصلوں سے خوش نہیں ہیں۔
سابق وزیر اعلیٰ نے ان باتوں کا اظہار منگل کے روز جنوبی کشمیر کے ضلع اننت ناگ میں ایک انتخابی ریلی کے حاشیہ پر نامہ نگاروں کے ساتھ بات کرنے کے دوران کیا۔
محبوبہ نے کہا’’کل سری نگر لوک سبھا سیٹ کے لئے اچھی پولنگ ہوئی کیونکہ یہاں گذشتہ پانچ برسوں سے لوگوں کا دم گٹھ رہا ہے ‘‘۔ان کا کہنا تھا’’لوگ دلی کو ایک پیغام دینا چاہتے ہیں کہ جو سال۲۰۱۹میں فیصلے لئے گئے اور اس کے بعد جو ہماری زمین، نوکریوں کے متعلق فیصلے لئے گئے وہ لوگوں کو قابل قبول نہیں ہیں‘‘۔
سابق وزیر اعلیٰ نے کہا’’میں الیکشن کمیشن سے کہنا چاہتی ہوں کہ کل جہاں جہاں پر لوگوں کی زیادہ بھیڑ جمع ہوئی اور اشارہ ملا کہ وہ پی ڈی پی کو ووٹ دیں گے تو وہاں پولنگ عمل کو جان بوجھ کر سست کر دیا گیا‘‘۔
پی ڈی پی کی صدر نے کہا’’جس طرح سری نگر لوک سبھا سیٹ کے لئے اچھی ووٹنگ ہوئی میں چاہتی ہوں کہ اننت ناگ ، راجوری سیٹ پر لوگ اچھی تعداد میں ووٹ ڈالیں‘‘۔
محبوبہ کا کہنا تھا کہ لوگ ووٹ ڈال کر اپنی آواز کو پارلیمنٹ میں پہنچانا چاہتے ہیں۔