ای سی آئی کے ایس او پیز کے تحت دفعہ۱۴۴کا نفاذ لازمی :ڈی ایم

سرینگر///
ضلع مجسٹریٹ(ڈی ایم) پلوامہ نے ہفتے کے روز کہا کہ ضلع میں دفعہ۱۴۴کے تحت نافذ پابندیوں کو انتخابی مہم کے آخری ۷۲؍اور ۴۸آخری گھنٹوں کے لئے الیکشن کمیشن آف انڈیا کے مخصوص ایس او پیز کے تحت لازمی قرار دیا گیا ہے ۔انہوں نے کہا کہ ایسے احکامات باقی اضلاع نے بھی جاری کئے ہیں۔
بتادیں کہ حکام نے ضلع میں ہفتے کی شام۶بجے سے۱۳مئی تک دفعہ ۱۴۴کے تحت پابندیاں نافذ کی ہیں۔
ضلع مجسٹریٹ نے ہفتے کو’ایکس‘پر دفعہ۱۴۴نافذ کرنے کے متعلق وضاحت کرتے ہوئے ایک پوسٹ میں کہا’’الیکشن کمیشن آف انڈیا کی گائیڈ لائنز انتخابی مہم کے آخری۷۲گھنٹوں اور آخری۴۸گھنٹوں کے لئے مخصوص ایس او پیز کو لازمی قرار دیتے ہیں‘‘۔
مجسٹریٹ نے کہا’’عوامی نمائندگی ایکٹ۱۹۵۱کے سیکشن۱۲۶؍اور سیکشن۱۳۰کے تحت ایس او پیز تحت دفعہ۱۴۴کے احکامات جاری کرنے حق دیتا ہے ‘‘۔
ضلع مجسٹریٹ نے پوسٹ میں کہا کہ ایسے احکامات باقی اضلاع نے بھی جاری کئے ہیں جہاں پولنگ ہوئی ہے یا ہونے والی ہے ۔انہوں نے کہا’’ان پابندیوں کا اطلاق مہم سے متعلق مخصوص سرگرمیوں کیلئے ہے اور پابندیوں کا تعلق صرف مخصوص نکات سے ہے نہ کہ عام پابندیوں کے متعلق ہے ‘‘۔
پوسٹ میں کہا گیا کہ ضلع میں ہفتے کی شام۶بجے سے۱۳مئی تک دفعہ۱۴۴کے تحت پابندیاں نافذ رہیں گی۔واضح رہے کہ ضلع پلوامہ سری نگر لوک سبھا سیٹ کا ایک حصہ ہے جس کیلئے۱۳مئی کو پولنگ ہوگی۔