پونچھ میں فورسز اور دہشت گردوں کے درمیان فائرنگ کا تبادلہ

جموں//
جموں کشمیر کے ضلع پونچھ میں ہندوستانی فضائیہ کے قافلے پر حملے میں ایک شخص کی موت کے بعد جمعہ کے روز ضلع میں سیکورٹی فورسز اور دہشت گردوں کے درمیان فائرنگ کا تبادلہ جاری ہے۔
عہدیداروں نے بتایا کہ پونچھ کے سینائی ٹاپ علاقے میں سیکورٹی فورسز اور دہشت گردوں کے درمیان فائرنگ کا تبادلہ شروع ہوا۔
خیال کیا جاتا ہے کہ یہ دہشت گردوں کا وہی گروپ ہے جس نے۵ مئی کو فضائیہ کی ایک گاڑی پر حملہ کیا تھا جس میں فضائیہ کے اہلکار ‘وکی پہاڑے ہلاک اور۴ دیگر فضائی اہلکارزخمی ہوئے تھے۔
پانچ مئی سے سیکورٹی فورسز نے پونچھ اور راجوری اضلاع میں دہشت گردوں کا سراغ لگانے کیلئے آپریشن شروع کیا ہے۔
سکیورٹی فورسز کا کہنا ہے کہ دہشت گردوں کا یہ گروہ گھنے جنگلات والے علاقے میں سرگرم ہے۔
پولیس نے دو دہشت گردوں کے خاکے بھی جاری کیے جن کے بارے میں خیال کیا جاتا ہے کہ انہوں نے فضائیہ کی گاڑیوں پر حملہ کیا تھا۔
سیکورٹی فورسز نے سی سی ٹی وی کیمرے سے پکڑے گئے ویڈیو کلپ سے ۳ دہشت گردوں کی تصاویر بھی جاری کیں۔ اعلیٰ ذرائع نے بتایا کہ یہ تینوں دہشت گرد سیکورٹی فورسز کی انتہائی مطلوب فہرست میں شامل ہیں۔