کولگام میں جھڑپ:ایک اور جنگجو مارا گیا :پولیس

سرینگر/۸مئی
جموں کشمیر کے ضلع کولگام میں بدھ کے روز سیکورٹی فورسز کے ساتھ ایک تازہ تصادم میں ایک دہشت گرد مارا گیا۔
عہدیداروں نے بتایا کہ ضلع کے ریڈوانی علاقے میں انکاو¿نٹر کے مقام کے قریب مکانات کی تلاشی کے دوران تازہ فائرنگ کا تبادلہ ہوا اور ایک دہشت گرد وہاں چھپا ہوا تھا۔
عہدیداروں نے بتایا کہ آج ایک دہشت گرد مارا گیا اور مرنے والے کی شناخت کی جارہی ہے۔انہوں نے بتایا کہ آخری اطلاعات ملنے تک فائرنگ جاری تھی۔
منگل کے روز سیکورٹی فورسز کے ساتھ تصادم میں لشکر طیبہ کے مطلوب دہشت گرد باسط ڈار سمیت دو عسکریت پسند مارے گئے تھے۔
معلوم ہوا ہے کہ رہائشی مکان کے ملبے کو صاف کرنے کے دوران وہاں پر چھپے بیٹھے ملی ٹینٹ نے سیکورٹی فورسز پر فائرنگ کی جس کے بعد سلامتی عملے نے بھی پوزیشن سنبھال کر جوابی کارروائی کا آغاز کیا۔
پولیس ذرائع نے بتایا کہ منگل کے روز سیکورٹی فورسز کے ساتھ تصادم میں لشکر کمانڈر باسط ڈار اور اس کا ساتھی مارا گیا۔انہوں نے بتایا کہ سیکورٹی فورسز کو مصدقہ اطلاع موصول ہوئی تھی کہ رہائشی مکان میں تین ملی ٹینٹ چھپے بیٹھے ہیں جس کے پیش نظر آپریشن کو جاری رکھا گیا ۔
ان کے مطابق بدھ کی سہ پہر تصادم کی جگہ اچانک ایک جنگجو نمودار ہوا جس نے فورسز پر فائرنگ شروع کی۔انہوں نے مزید بتایا کہ علاقے میں سیکورٹی فورسز اور ملی ٹینٹ کے درمیان شدید گولیوں کا تبادلہ جاری ہے ۔
ذرائع نے بتایا کہ سیکورٹی فورسز کی نفری کوپھر سے طلب کرکے آس پاس علاقوں میں پہرے بٹھا دئے گئے ہیں۔