’ الیکشن تیاریاں زوروں پر ہیں‘۔۔۔جموںکشمیر کے چیف الیکٹورل افسرکا بارہمولہ پارلیمانی حلقے کا دورہ

سرینگر//
جموںکشمیر کے چیف الیکٹورل افسر (سی ای او) پی کے پولے کا کہنا ہے کہ الیکشن کمیشن کی طرف سے پولنگ شیڈول جاری کرنے کے بعد سے جموں وکشمیر میں الیکشن کیلئے تیاریاں زوروں پر ہیں۔
پولے نے کہا کہ پہلی بار ووٹ ڈالنے والے رائے دہندگان میں کافی جوش و جذبہ دیکھا جا رہا ہے ۔
سی ای او نے ان باتوں کا اظہار جمعہ کے روز میڈیا کے ساتھ بات کرنے کے دوران کیا۔
سی ای او نے کہا’’الیکشن کے لئے پچھلے پانچ مہینوں سے تیاریاں جا ری ہیں اور جب سے الیکشن کمیشن نے شیڈول نوٹیفائی کیا ہے تب سے تیاریوں نے زور پکڑا ہے ‘‘۔
پولے کا کہنا تھا’’بارہمولہ لوک سبھا سیٹ کیلئے ۲مئی تک۱۹؍امید واروں نے کاغذات نامزدگی جمع کئے تھے جبکہ سری نگر کیلئے۲۴؍اور اننت ناگ ، راجوری لوک سبھا سیٹ کیلئے۲۰؍امید واروں نے کاغذات نامزدگی جمع کئے ہیں‘‘۔
سی ای او نے کہا کہ اس سے ظاہر ہوتا ہے کہ نہ صرف امید واروں بلکہ لوگوں میں بھی الیکشن کے تئیں کافی جوش و جذبہ ہے ۔انہوں نے کہا کہ جن رائے دہندگان کی عمر ۸۵سال سے زیادہ ہے اور جو۴۵فیصد جسمانی طور معذور ہیں ان کے لئے گھر سے ووٹ ڈالنے کا بند وبست کیا گیا ہے بشرطیکہ انہوں نے اس کی درخواست کی ہو۔
پولے کا کہنا تھا’’پہلی بار ووٹ ڈالنے والوں میں بھی کافی جوش و جذبہ ہے ، میں ان کو یقین دلاتا ہوں کہ ان کو پولنگ مراکز پر اچھا تجربہ حاصل ہوگا‘‘۔
سی ای او نے کہا کہ تمام پولنگ مراکز پر تمام تر بنیادی سہولیات کو دستیاب رکھا گیا ہے اور ہر پولنگ مرکز پر مردوں اور خواتین کے لئے الگ الگ ہلپر رکھے گئے ہیں۔
ایک سوال کے جواب میں انہوں نے کہا کہ کپوارہ میں ہمیشہ ووٹنگ شرح اچھی رہتی ہے اور اس بار بھی ایسی ہی امید ہے ۔انہوں نے ووٹروں سے اپیل کی کہ وہ اپنے اپنے پولنگ مراکز پر پہنچ کر اپنے اپنے پسندیدہ امید واروں کے حق میں ووٹ ڈالیں۔