۳۷۰ کی منسوخی کے بعد جموں کشمیر میں ترنگا بڑے فخر سے لہرارہا ہے:شاہ

سرینگر//
وفاقی وزیر داخلہ ‘امت شاہ نے کہا ہے کہ دفعہ ۳۷۰ کی منسوخی کے بعد جموں کشمیر میں ترنگا بڑے فخر سے لہرارہا ہے ۔
وزیر داخلہ نے کہا کہ ۴ جون کو لوک سبھا انتخابات کے نتائج کے بعد راہل گاندھی ’کانگریس ڈھونڈو یاترا ‘نکالنے پر مجبور ہو جائے گا ۔
اتر پردیش کے شہر‘ رائے بریلی میں آج ایک انتخابی جلسے سے خطاب میں شاہ نے کہا ’’کانگریس صدر پوچھتے ہیں کہ راجستھان اور اتر پردیش کے لوگوں کا کشمیر سے کیا لینا دینا ہے۔ وہ نہیں جانتے کہ کشمیر کے لیے بریلی کا ہر بچہ اپنی جان قربان کر سکتا ہے۔ کشمیر میں ہمارا ترنگا فخر سے لہرا رہا ہے‘‘۔
پلوامہ حملے کے بعد سرجیکل اسٹرائیک کے بارے میں وزیر داخلہ نے کہا کہ پچھلی کانگریس حکومتوں میں اس طرح کی کارروائیوں کے لئے کوئی انتقام نہیں لیا جاتا تھا اور کوئی بھی ملک میں داخل ہو سکتا تھا اور بم دھماکے کر سکتا تھا۔انہوں نے کہا’’ہم نے دہشت گردوں سے چھٹکارا حاصل کرنے کے لیے پاکستان کے اندر سرجیکل اسٹرائیک کی‘‘۔
شاہ نے کہا کہ سماج وادی پارٹی کے دور میں یوپی میں فیکٹریاں دیسی پستول تیار کرتی تھیں لیکن اب وہ ٹینک اور میزائل تیار کرتی ہیں جو پاکستان پر فائر کیے جائیں گے۔
مرکزی وزیر داخلہ نے راہول گاندھی پر حملہ کرتے ہوئے کہا کہ انہوں نے اپنی پارٹی کی مہم کا آغاز بھارت جوڈو یاترا سے کیا تھا جو ’کانگریس ڈھونڈھو یاترا‘ کے ساتھ اختتام پذیر ہوگی۔
شاہ نے کہا’’گھمنڈیا انڈیا الائنس کے شہزادے نے اپنی انتخابی مہم کا آغاز بھارت جوڈو یاترا سے کیا تھا لیکن ۴جون (گنتی کے دن) کو اس کا اختتام ’کانگریس ڈھونڈھو یاترا‘ کے ساتھ ہوگا۔
وزیر داخلہ نے کہا کہ پہلے دو مرحلوں میں کانگریس کہیں بھی نہیں ہے جبکہ نریندر مودی نے۴۰۰ سیٹوں کی دوڑ میں ایک سنچری بنائی ہے اور برتری حاصل کرلی ہے۔
شاہ نے کہا کہ یہ الیکشن دہشت گردی اور نکسل ازم کو ختم کرنے اور ہندوستان کو عالمی سطح پر تیسری بڑی معیشت بنانے کے لئے ہے۔