سرینگر/۲۷؍اپریل
مرکزی وزیر داخلہ امیت شاہ نے ہفتہ کے روز کہا کہ اگر نریندر مودی مسلسل تیسری مدت کے لئے وزیر اعظم بنے رہتے ہیں تو وہ ملک سے دہشت گردی اور نکسل ازم کا خاتمہ کریں گے اور ہندوستان کو دنیا کی تیسری سب سے بڑی معیشت بنا دیں گے۔
شاہ ہفتہ کوبھارتیہ جنتا پارٹی (بی جے پی) کے امیدوار منسکھ منڈویا کی حمایت میں گجرات کے پوربندر میں ایک انتخابی ریلی سے خطاب کر رہے تھے۔
وزیر داخلہ نے کہا کہ جب دفعہ۳۷۰کو ختم کیا گیا تھا تو کانگریس لیڈر راہول گاندھی نے اس اقدام کی مخالفت کرتے ہوئے کہا تھا کہ اس سے کشمیر میں خون کی ندی بہہ جائے گی۔
شاہ نے کہا’’پچھلے پانچ سالوں میں، خون کی ندی تو دور کی بات، کسی نے وہاں پتھر پھینکنے کی ہمت بھی نہیں کی۔ وزیر اعظم مودی نے ملک سے دہشت گردی اور نکسل ازم کو ختم کرنے کے لئے کام کیا۔ جب منموہن سنگھ ملک کے وزیر اعظم تھے تو کوئی بھی پاکستان سے ملک میں داخل ہو سکتا تھا اور بم اڑا سکتا تھا‘‘۔
وزیر داخلہ نے کہا کہ جب پاکستان نے پلوامہ اور اڑی میں دہشت گردانہ حملے کئے تو وہ بھول گیا کہ مودی وزیر اعظم تھے۔۱۰دن کے اندر وزیر اعظم مودی نے پاکستان کی سرزمین سے دہشت گردوں کو ختم کرنے کے لئے سرجیکل اور فضائی حملے کیے۔’’ملک سے دہشت گردی اور نکسل ازم کو ختم کرنے کے لئے نریندر مودی کو تیسری بار وزیر اعظم بنائیں‘‘۔
شاہ نے کہا کہ وزیر اعظم مودی نے ملک کو محفوظ اور اسے خوشحال بنانے کے لئے کام کیا ہے۔ اپنے ۱۰سالہ اقتدار میں کانگریس پارٹی نے ملک کی معیشت کو ۱۱ ویں مقام پر چھوڑ دیا۔ وزیر اعظم مودی نے اسے صرف۱۰سالوں میں پانچویں مقام پر پہنچایا۔’’ اور میں آپ کو گارنٹی دیتا ہوں، انہیں تیسری مدت کے لئے وزیر اعظم بنائیں، اور ہندوستان تیسری سب سے بڑی معیشت بن جائے گا۔‘‘ (ایجنسیاں)