نئی دہلی/۲۳اپریل
بی جے پی نے منگل کو لداخ لوک سبھا سیٹ سے تاشی گیالسن کو اپنا امیدوار نامزد کیا اور موجودہ رکن پارلیمنٹ جمیانگ شیرنگ نامگیال کو ہٹا دیا۔
گیالسن لیہہ میں لداخ خودمختار پہاڑی ترقیاتی کونسل کے چیئرمین اور چیف ایگزیکٹو کونسلر ہیں۔
نامگیال 2019 میں لوک سبھا میں آرٹیکل 370 کو منسوخ کرنے اور لداخ کو ایک علیحدہ مرکز کے زیر انتظام علاقہ بنانے کے نریندر مودی حکومت کے فیصلے کا دفاع کرنے کےلئے اپنی وائرل تقریر سے سرخیوں میں آئے تھے۔
بی جے پی نے نامگیال کو ہٹانے کا فیصلہ لیہہ میں بدھ مت کے پیروکاروں کے ایک طبقے میں حکمراں جماعت کے خلاف ناراضگی کے درمیان کیا ہے۔
مقامی ذرائع نے بتایا کہ گیالسن جو ایک وکیل بھی ہیں، اس سیٹ پر بی جے پی کی گرفت برقرار رکھنے کے لئے بہتر پوزیشن میں ہیں، جس میں مسلم اکثریتی کارگل بھی شامل ہے۔
اس حلقے میں 20 مئی کو ووٹ ڈالے جائیں گے۔