غلام نبی آزاد لوک سبھا الیکشن نہیں لڑیں گے

سرینگر/۱۷اپریل
: ڈیموکریٹک پروگریسو آزاد پارٹی (ڈی پی اے پی) کے چیئرمین غلام نبی آزاد جموں و کشمیر کے اننت ناگ راجوری سیٹ سے لوک سبھا الیکشن نہیں لڑیں گے۔
ڈی پی اے پی کے چیف ترجمان سلیم پرے نے ایک مقامی خبر رساں ایجنسی کو بتایا کہ پارٹی سرپرست جی این آزاد کی موجودگی میں پارٹی نے انہیں اننت ناگ راجوری حلقہ سے ڈی پی اے پی کے امیدوار کے طور پر فائنل کیا ہے۔
ڈی پی اے پی لیڈر نے کہا کہ آزاد کے پاس انتخاب نہ لڑنے کی کچھ وجوہات ہیں۔پرے نے کہا”آزاد نے (میٹنگ میں) کچھ وجوہات بتائیں اور پھر انہوں نے مجھے میدان میں اتارنے کا فیصلہ کیا“۔
۲اپریل کو ڈی پی اے پی نے اعلان کیا تھا کہ آزاد اننت ناگ راجوری سیٹ سے الیکشن لڑیں گے۔ڈی پی اے پی کے رہنما تاج محی الدین نے کہاتھا”آج ڈی پی اے پی کی کور کمیٹی کی میٹنگ ہوئی اور ہم نے فیصلہ کیا کہ (پارٹی صدر) غلام نبی آزاد اننت ناگ راجوری سیٹ سے انتخاب لڑیں گے“۔
اس حلقے سے نیشنل کانفرنس نے میاں الطاف کو ٹکٹ دیا ہے جبکہ ،حبوبہ مفتی پی ڈی پی کی امےدوار ہوں گی۔بی جے پی نے ابھی تک اس حلقے سے اپنے امیدوار کے نام کا اعلان نہیں کیا ہے ۔
وفاقی وزیر داخلہ‘ امت شاہ نے گزشتہ روز اشارہ دیا کہ بی جے پی کشمیر کے تینوں حلقوں سے اپنے امیدوار کھڑا نہیں کرےگی ۔ ان کاکہنا تھا کہ بی جے پی کو کشمیر میں کنول کو کھلتے دیکھنے کی کوئی جلدی نہیں ہے کیونکہ ان کی جماعت پہلے کشمیریوں کا دل جےتنا چاہتی ہے ۔