نئی دہلی/ 20 مارچ
مرکزی وزیر امت شاہ نے چہارشنبہ کے روز کہا کہ جموں و کشمیر میں 30 ستمبر سے پہلے انتخابات کرائے جائیں گے۔
نئی دہلی میں سی این این نیوز 18 رائزنگ انڈیا سمٹ 2024 سے خطاب کرتے ہوئے شاہ نے کہا”جموں و کشمیر میں ووٹنگ ہندوستان کی سپریم کورٹ کی 30 ستمبر کی ڈیڈ لائن سے پہلے ہوگی“۔
سپریم کورٹ نے 11 دسمبر 2023 کو الیکشن کمیشن آف انڈیا (ای سی آئی) کو جموں و کشمیر میں 30 ستمبر 2024 تک انتخابات کرانے کی ہدایت دی تھی۔
بنچ نے کہا”ہم ہدایت دیتے ہیں کہ 30 ستمبر 2024 تک جموں و کشمیر کی قانون ساز اسمبلی کے انتخابات کرانے کے لئے اقدامات کیے جائیں اور جتنی جلدی ممکن ہو ریاست کا درجہ بحال کیا جائے“۔
جموں و کشمیر میں آخری اسمبلی انتخابات 2014 میں ہوئے تھے۔ پیپلز ڈیموکریٹک پارٹی (پی ڈی پی) نے بی جے پی کے ساتھ مخلوط حکومت تشکیل دی۔ لیکن 2018 میں بی جے پی نے اتحاد سے علیحدگی اختیار کرلی اور حکومت گر گئی۔ اس کے بعد اسمبلی کو تحلیل کر دیا گیا اور گورنر راج نافذ کر دیا گیا۔
5 اگست 2019 کو مرکز نے آرٹیکل 370 کو منسوخ کر دیا تھا اور سابق ریاست کو جموں و کشمیر اور لداخ کے مرکز کے زیر انتظام علاقوں (یو ٹی) میں تقسیم کر دیا تھا۔
اپوزیشن کو تنقید کا نشانہ بناتے ہوئے مرکزی وزیر داخلہ نے یہ بھی کہا کہ جن لوگوں نے 75 سال تک کشمیر کو جمہوریت اور فلاح و بہبود سے محروم رکھا ہے انہیں سزا ملنی چاہئے۔
آئندہ لوک سبھا انتخابات 2024 میں بی جے پی کی کارکردگی کے بارے میں بات کرتے ہوئے شاہ نے کہا کہ ان کا ماننا ہے کہ پارٹی اترپردیش میں اپنی اب تک کی بہترین کارکردگی کا مظاہرہ کرے گی اور 2014 کے انتخابات کے مقابلے میں زیادہ نشستیں حاصل کرے گی۔
وزیر نے یہ بھی کہا کہ ہندوستان پریوار وادی پارٹیوں کو شکست دے گا۔