سونیا گاندھی راجستھان سے راجیہ سبھا کیلئے نامزد

جے پور//
کانگریس کی سابق صدر سونیا گاندھی نے راجستھان سے راجیہ سبھا انتخابات کیلئے کانگریس امیدوار کے طور پر بدھ کے روز اپنا پرچہ نامزدگی داخل کیا۔
سونیا گاندھی نے اسمبلی میں ریٹرننگ آفیسر مہاویر پرساد شرما کے پاس اپنے کاغذات نامزدگی جمع کرائے ۔
اس موقع پر کانگریس کے سابق صدر راہل گاندھی، جنرل سکریٹری پرینکا گاندھی اور کے سی وینوگوپال، سابق وزیر اعلیٰ اشوک گہلوت، کانگریس کے ریاستی صدر گووند سنگھ ڈوٹاسرا اور اپوزیشن لیڈر تکارام جولی وغیرہ ان کے ہمراہ تھے ۔
اس سے قبل سونیا گاندھی نے کانگریس قانون ساز پارٹی کی میٹنگ میں بھی حصہ لیا ۔ میٹنگ میں کانگریس لیڈروں نے سونیا گاندھی کو پھولوں کا گلدستہ پیش کرکے ان کا استقبال کیا۔
اس موقع پر ڈوٹاسرا نے کہا کہ پارٹی راجیہ سبھا کے لیے سونیا کی نامزدگی داخل کرنے سے بہت پرجوش ہے ۔ اس سے کانگریس کے حوصلے بلند ہوں گے اور راجیہ سبھا میں ان کے داخلے سے پارٹی کو کافی تقویت ملے گی۔
پارٹی راجستھان میں آنے والے لوک سبھا انتخابات میں ان کی اور پارٹی صدر ملک ارجن کھڑگے کی قیادت میں کام کرکے اچھی کارکردگی کا مظاہرہ کرے گی۔
واضح رہے کہ محترمہ سونیا گاندھی اس وقت رائے بریلی سے لوک سبھا میں رکن پارلیمنٹ ہیں۔
راجستھان سے دو سالہ راجیہ سبھا انتخابات میں تین سیٹوں پر۲۷فروری کو انتخابات ہوں گے ۔ اس کے لیے کاغذات نامزدگی ۱۵فروری تک داخل کیے جاسکتے ہیں اور کاغذات نامزدگی کی جانچ ۱۶فروری کو ہوگی جب کہ ۲۰ فروری تک نام واپس لیے جاسکتے ہیں۔
اس الیکشن میں اسمبلی میں ایم ایل اے کی تعداد کے مطابق حکمراں بی جے پی امیدوار کو دو اور کانگریس امیدوار کو ایک سیٹ جیتنے کا امکان ہے ۔ اگر اس الیکشن میں صرف تین امیدواروں کو نامزد کیا جائے تو یہ الیکشن بلا مقابلہ مکمل ہو سکتا ہے ۔
اس دوران بھارتیہ جنتا پارٹی (بی جے پی) نے مرکزی وزراء ایشونی ویشنو اور‘ ایل مروگن کو راجیہ سبھا کا ٹکٹ دیا ہے اور اس طرح ان کے لوک سبھا انتخابات میں حصہ لینے کے امکانات نہ ہونے کے برابر ہو گئے ہیں۔
بی جے پی نے آج مدھیہ پردیش اور اڈیشہ سے دو سالہ راجیہ سبھا انتخابات کے لیے پانچ امیدواروں کی فہرست جاری کی جس میں ان دو مرکزی وزراء کے نام شامل ہیں۔
پارٹی کے جنرل سکریٹری ارون سنگھ نے کہا کہ بی جے پی کی مرکزی الیکشن کمیٹی نے ان ناموں کو منظوری دے دی ہے ۔
بی جے پی نے مدھیہ پردیش سے ایل مروگن کو دوبارہ ٹکٹ دیا ہے جبکہ دیگر تین امیدوار نئے ہیں۔ امیش ناتھ مہاراج‘مایا نارولیا اور بنسی لال گجر کو ٹکٹ دیا گیا ہے جبکہ اشونی ویشنو کو اڈیشہ سے میدان میں اتارا گیا ہے ۔
بتایا گیا کہ پارٹی نے ویشنو کو اڈیشہ کی کٹک لوک سبھا سیٹ سے امیدوار بنانے کے اشارے دیے تھے اور ویشنو نے تیاریاں بھی شروع کر دی تھیں۔ اسی طرح تمل ناڈو میں مروگن کو میدان میں اتارنے کے اشارے ملے تھے ۔ تاہم ان دونوں رہنماؤں کو الیکشن مینجمنٹ میں اہم رول دیا جائے گا۔