وزیر اعظم مودی کا دورہ جموں وکشمیر، کثیر دائروں والی سیکورٹی کا بندوبست

سرینگر//
وزیر اعظم نریندر مودی۲۰فروری کو جموں وکشمیر کے دورے پر آرہے ہیں جس کے پیش نظر جموں صوبے میں کثیر دائروں والی سیکورٹی کا بندوبست کیا گیا ہے ۔
ذرائع نے بتایا ‘وزیر اعظم مودی کے دورہ جموں وکشمیر کیلئے سیکورٹی کے مثالی انتظامات کئے گئے ہیں، جموں پٹھان کوٹ قومی شاہراہ پر فورسز کی اضافی نفری تعینات کردی گئی ہے ‘۔
ایک سینئر عہدیدار نے بتایا کہ وزیر اعظم کے دورے کے پیش نظر تمام سیکورٹی ایجنسیاں ہائی الرٹ پر ہیں۔ انہوں نے مزید بتایا کہ صوبہ جموں میں ناکوں کا جال بچھایا گیا ہے ۔
عہدیدار نے مزید کہا کہ جموں شہر میں مختلف سڑکوں بالخصوص ائر پورٹ روڈ پر موبائیل چیک پوائنٹس قائم کئے گئے ہیں جہاں پولیس اور سینٹرل ریزرو پولیس فورس(سی آر پی ایف) کے اہلکار تعینات کئے گئے ہیں۔
ذرائع نے بتایا کہ جموں صوبے میں چپے چپے پر سیکورٹی فورسز کی تعیناتی عمل میں لائی گئی ہے جبکہ مشکوک نظر آنے والے افراد کو بغیر چیکنگ کے آگے جانے کی اجازت نہیں دی جارہی ہے۔
ذرائع کا کہنا ہے کہ وزیرا عظم نریندر مودی کے جموں دورے پر سبھی کی نظریں ٹکی ہوئی ہیں کیونکہ بھاجپا کے سینئر لیڈروں کا کہنا ہے کہ دورہ غیر معمولی اہمیت کا حامل ہے ۔
دریں اثنا وزیر اعظم دفتر میں تعینات وزیر مملکت ڈاکٹر جتندر سنگھ نے کہاکہ نریندر مودی ۲۰فروری کو جموں وکشمیر کے ادھمپور ضلع میں ایک ریلی سے خطاب کریں گے ۔
سنگھ نے مزید بتایا کہ وزیرا عظم کے جموں دورے کو حتمی شکل دی گئی ہے اور اس حوالے سے سیکورٹی کے بھی پختہ انتظامات کئے جارہے ہیں۔
مرکزی وزیر نے کہاکہ اپنے دورے کے دوران وزیر اعظم سانبہ کے وجے پور میں آل انڈیا انسٹی چیوٹ آف میڈیکل سائنسز ، ریاسی ضلع میں چناب پر سب سے اونچے ریلوے پل، ادھم پور میں آئی آئی ایم اور شاہ پورہ میں دیویکا پروجیکٹ کا افتتاح کریںگے ۔
سنگھ نے کہاکہ وزیراعظم کے دورے کے پیش نظر انتظامی اورسیکورٹی سطح پر انتظامات کو آخری شکل دی جارہی ہے۔