بمنہ میں شادی شدہ خاتون کے قتل کا معمہ حل، چار گرفتار :پولیس

سرینگر//
سرینگر پولیس نے بمنہ علاقے میں شادی شدہ خاتون کے قتل کیس کو پانچ دنوں کے اندر اندر حل کرکے چار ملزمان کی گرفتاری عمل میں لائی۔
پولیس کے ایک ترجمان نے بتایا کہ۱۷؍اکتوبر۲۰۲۳کو پولیس اسٹیشن بمنہ کو اطلاع موصول ہوئی کہ دربل بمنہ میں ایک خاتون کی لاش پر اسرار حالت میں برآمد کی گئی۔پولیس ٹیم فوری طورپر جائے موقع پر پہنچی اور لاش کو تحویل میں لے کر اس کی شناخت تنویرا زوجہ شوکت احمد کالو ساکن نند ریش کالونی کے بطور ہوئی۔
پولیس نے معاملے کی نسبت ایف آئی آر زیر نمبر۱۰۱/۲۰۲۳زیر دفعہ۳۰۲آئی پی سی کے تحت کیس درج کرکے تحقیقات شروع کی۔
ترجمان نے بتایا کہ ایس ڈی پی او ویسٹ کی سربراہی میں تشکیل دی گئی ٹیم نے تحقیقات شروع کی جس دور ان پتہ چلا کہ۱۶؍اکتوبر کو ویسٹ اینڈ کالونی حیدر پورہ میں خاتون کا قتل کیا گیا اور بعد ازاں اس کی لاش کو حیدر پورہ سے دربل بمنہ پہنچایا گیا تاکہ تحقیقاتی ایجنسی کا دھیان دوسری اور بھٹکایا جا سکے۔
پولیس ترجمان نے بتایا کہ ٹیکنیکل ثبوت و شواہد اور مشتبہ افراد سے پوچھ تاچھ کے دوران چار افراد جن کی شناخت عابینہ پرویز زوجہ پرویز احمد شاہ ساکن ویسٹ اینڈ کالونی حیدر پورہ ، کمسن لڑکی، غلام محمد آہنگر ولد مرحوم حاجی غلام حسن آہنگرساکن خوشی پورہ ایچ ایم ٹی حال گلپوش اپارٹمنٹ بمنہ اور جالہ زوجہ غلام محمد آہنگر ساکن خوشی پورہ ایچ ایم ٹی حال گلپوش اپارٹمنٹ بمنہ کے بطور ہوئی ہے کی گرفتاری عمل میں لائی گئی۔
ترجمان نے بتایا کہ اس سلسلے میں مزید تحقیقات جاری ہے۔