غزہ میں ہسپتال پر بمباری جارحیت اور بربریت کی سیاہ ترین مثال:فاروق

سرینگر//
نیشنل کانفرنس کے صدر‘ڈاکٹر فاروق عبداللہ (رکن پارلیمان )نے غزہ میں جاری اسرائیل بربریت اور ظلم و تشدد کی شدید الفاظ میں مذمت کرتے ہوئے اقوام عالم اور اسلامی مملکتوں پر زور دیا ہے کہ بیان بازی اور زبانی جمع خرچ سے آگے بڑھ کر فوری طور پر جنگ بندی کے علاوہ فلسطینی عوام کے جان و مال کے تحفظ اور مزید خون خرابہ روکنے میں کردار ادا کریں۔
این سی صدر نے اسرائیلی کی طرف سے ہسپتالوں ، رہائشی کالنیوں اور مذہبی مقامات کو نشانہ بنانے کی کارروائی کی شدید الفاظ میں بھی مذمت کی۔
ان باتوں کا اظہار انہوں نے آج آثار شریف درگاہِ حضرت بل میںنماز جمعہ ادا کرنے کے بعد کیا۔
سابق وزیر اعلیٰ نے اس موقعے پر عالم اسلام کی سربلندی، فلسطینی عوام کے فتح و نصرت اور صبر و جمیل کیلئے خصوصی دعا کی۔
ڈاکٹر فاروق نے کہا کہ فلسطین کو ہمارے برگزیدہ پیغمبروں اور مذہبی مقامات خصوصاً قبلہ اول ہونے کا شرف حاصل ہے اور کشمیری عوام کو ہمیشہ سے ہی فلسطینی عوام کے ساتھ وائلانہ عقیدت رہی ہے اور ان کی آزادی کی حمایت کرتے آئے ہیں۔
این سی صدر نے مسلم ممالکوں سے اپیل کی کہ وہ مسلم اتحاد قائم دائم رکھنے کی ہر ممکن کوشش کو یقینی بنائیں تاکہ متحد ہو کر مسلم دشمن عناصروں اور صیہونی طاقتوں کے مذموم ارادے ناکام ہوسکیں۔
ڈاکٹر فاروق نے کہا کہ اللہ ہی ہمارا واحد مددگا ر ہے اور وہی فلسطین اور ہمیں موجودہ مشکلات اور تباہ کن حالات سے نجات دلا سکتا ہے ۔