جی ڈبلیو ۱۳ سے کشمیرمیں بجلی کا منظر نامہ بہتر ہوگا

سرینگر//
جموںکشمیر کے لیفٹیننٹ گورنر منوج سنہا نے جمعے کے روز کہاکہ گیگا واٹ (جی ڈبیلو)۱۳قابل تجدید توانائی پروجیکٹ کیلئے وزیر اعظم نریندر مودی کا مشکور ہوں۔
ایل جی نے کہاکہ اس پروجیکٹ کو لہیہ ، آلسٹینگ سری نگر ٹرانسمیشن لائن سے بھی جوڑا جائے گا جس سے وادی کشمیر کو سردی کے ایام میں متواتر بجلی فراہم ہوگی۔ان کے مطابق یہ منصوبہ وادی کو بجلی کا متبادل ذریعہ پیش کرے گا جس کے نتیجے میں سرمائی ایام کے دوران جموں وکشمیر کو بجلی کی معقول فراہمی یقینی بن جائے گی۔
ان باتوں کا اظہار جموں وکشمیر کے لیفٹیننٹ گورنر منوج سنہا نے راج بھون سری نگر میں ایک پریس کانفرنس سے خطاب کے دوران کیا۔
سنہانے کہاکہ حالیہ دنوں مرکزی حکومت نے لداخ کے لئے جی ڈبیلو ۱۳قابل تجدید توانائی پروجیکٹ کو منظوری دی ہے اور اس پروجیکٹ کو لہیہ آلسٹینگ سرینگر لائن سے بھی جوڑا جائے گا۔انہوں نے مزید بتایا کہ اس منصوبے سے وادی کشمیر کو بھی بجلی فراہم ہوگی اور یہ کہ میں مرکزی حکومت خاص کر وزیر اعظم نریندر مودی کا شکریہ ادا کرتا ہوں۔
ایل جی نے کہاکہ ۳گیگا واٹ قابل تجدید توانائی پروجیکٹ سے ملک کے دیگر حصوں کے علاوہ جموں وکشمیر بھی مستفید ہوگا۔انہوں نے کہاکہ یوٹی انتظامیہ لوگوں کو بغیر خلل اور قابل بھروسہ بجلی کی فراہمی کے لئے پر عزم ہے۔
سنہا نے مزید کہاکہ یہ باوقار منصوبہ چوبیس گھنٹے بجلی کی دستیابی کو یقینی بنائے گا۔ان کے مطابق لداخ سے کشمیر کو بجلی کی منتقلی سے جموں خطے میں بھی برقی رو کی صورتحال میں بہتری آئے گی۔
ایل جی نے کہاکہ بجلی پیدا کرنے کیلئے ٹرانسمیشن لائن ہماچل پردیش اور پنجاب سے ہوتے ہوئے ہریانہ تک چلے گی جو نیشنل گرڈ کے ساتھ مربوط ہوگی اور لداخ کے موجودہ گرڈ اور کشمیر کے گاندربل ضلع میں ۲۲۰کے وی آلسٹینگ گرڈ سے لہیہ ، آلسٹینگ سری نگر لائن کے ذریعے بجلی فراہم کرئے گی اور اس طرح سے وادی کشمیر کو بھی اس سے فائدہ ہوگا۔
لیفٹیننٹ گورنر نے کہاکہ گاندربل ضلع میں آلسٹینگ گرڈ کو مزید۲۲۰کے وی زینہ کوٹ گرڈ سے جوڑا گیا ہے ، مزید براں ۲۲۰کے وی میر بازار گرڈ کو آلسٹینگ گرڈ سے منسلک کیا جارہا ہے۔کشمیر کے۲۲۰کے وی گرڈز کے ساتھ لداخ کے مجوزہ کنیکٹوٹی کو مد نطر رکھتے ہوئے یہ یقین کے ساتھ کہا جاسکتا ہے کہ لداخ سے بجلی کی منتقلی پوری وادی کشمیر پر مثبت اثر ڈالے گی، خاص طور پر موسم سرما کے مہینوں میں بجلی کی دستیابی میں کافی بہتری آنے کی امیدہے۔
سنہانے مزید بتایا کہ جی ڈبیلو ۱۳منصوبہ بیٹری انرجی سٹوریج سسٹم سے لیس ہے جو لدخ اور کشمیر کے درمیان بچھائے گئے ٹرانسمیشن سسٹم کی صلاحیت کی بنیاد پر جموں وکشمیر کو چوبیس گھنٹے بجلی کی فراہمی کو یقینی بنائے گا۔انہوں نے کہاکہ اس منصوبے کی بدولت سردی کے ایام میں وولٹیج میں بھی بہتری واقع ہوگی۔
ایل جی نے کہاکہ خط لداخ میں آر ای پروجیکٹ کم کاربن فوٹ پرنٹس کے ساتھ قابل تجدید توانائی فراہم کرے گا اور کشمیر ، لدخ خطوں میں سردی کے ایام میں بجلی کی پیداواری صلاحیت بڑھائے گا۔انہوں نے مزید کہاکہ موجودہ لہیہ آلسٹینگ سری نگر لائن کے ذریعے آر ای پاور کی دستیابی وادی میں ٹرانسمیشن سسٹم کو بھی بہتر بنائے گا۔انہوں نے کہاکہ یوٹی انتظامیہ نے لداخ سے کشمیر تک چار سو کے وی کی نئی ٹرانسمشین لائن بچھانے کی تجویز پیش کی ہے۔
سردی کے ایام میں بجلی فراہم کرنے کے بارے میں پوچھے گئے سوال کے جواب میں ایل جی منوج سنہا نے کہا کہ انتظامیہ نے سردیوں کے دوران مزید بجلی کی فراہم کی خاطر زمینی سطح پر کام شروع کیا ہے۔
لیفٹیننٹ گورنر نے بتایا کہ برف ہٹانے کیلئے درکار سازو سامان بھی بہتر پوزیشن میں ہیں۔ایل جی نے کہاکہ راشن ، ادویات اور دیگر ضروری سہولیات کی بلا تعطل فراہمی کو بھی یقینی بنانے میں کوئی دقیقہ فروگزاشت نہیں کیا جارہا ہے۔