سری نگر، 19 اکتوبر (یو این آئی) جموں و کشمیر پولیس نے وسطی ضلع بڈگام میں ایک شخص جو اپنے آپ کو انڈین ایڈمنسٹریٹو افسر (آئی اے ایس) کے بطور ظاہر کر رہا تھا، کو ایک مقامی باشندے کے ساتھ دھوکہ دہی کے الزام میں گرفتار کیا ہے۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ بڈگام پولیس اسٹیشن کو 18 اکتوبر 2023 کو غلام حسن ملک ساکن عالی پورہ پتلی باغ کی طرف سے مبینہ تلبیس شخصی اسکینڈل کے متعلق ایک تحریری شکایت موصول ہوئی۔
انہوں نے کہا: ‘درخواست گذار نے الزام لگایا کہ آیوش کول معروف بہ وکی، ساکن روز لین نمبر 6 راج باغ سری نگر نے اپنے آپ کو آئی اے افسر کے بطور ظاہر کرکے مجھ سے میرے بیٹے کو سرکاری نوکری دلوانے کے عوض ساڑھے 6 لاکھ روپیے دھوکہ دہی سے حاصل کئے’۔
ترجمان کا کہنا تھا کہ اس شکایت پر پولیس اسٹیشن بڈگام میں آئی پی سی کے متعلقہ دفعات کے تحت کیس درج کرکے تحقیقات شروع کی گئیں۔
انہوں نے کہا: ‘تفتیش کے دوران بنیادی ملزم آیوش کول کو گرفتار کیا گیا اور یہ بھی انکشاف ہوا کہ کول کا برہان بشیر نامی ایک اور ساتھی بھی ہے جو نند ریش کالونی بمنہ کا رہائشی ہے’۔
بیان میں کہا گیا کہ دونوں کول اور برہان کو حراست میں لیا گیا۔
پولیس نے لوگوں سے ایسے افراد سے ہوشیار رہنے کی اپیل کی ہے۔
