بی جے پی الیکشن کرانے سے ڈر رہی ہے: وانی

جموں//
جموںکشمیر پردیش کانگریس کمیٹی کے صدر‘ وقار رسول وانی کا کہنا ہے کہ بی جے پی جموںکشمیر میں الیکشن کرانے سے ڈر رہی ہے ۔
وانی نے کہا کہ جموںکشمیر میں جب بھی الیکشن ہوں گے تو ان میں کانگریس کی صد فیصد کامیابی یقینی ہے ۔
کانگریسی یونٹ صدر نے ان باتوں کا اظہار پیر کے روز یہاں نامہ نگاروں کے ساتھ بات کرنے کے دوران کیا۔
وانی نے کہا’’بی جے پی چنائو کرانے سے ڈر رہی ہے کیونکہ ان کو اپنی ایجنسیوں نے رپورٹ دی ہے کہ وہ دونوں کشمیر میں بھی اور جموں میں بھی ہاریں گے ‘‘۔
کانگریسی لیڈر کا کہنا تھا کہ جب بھی جموںکشمیر میں چنائو ہوں گے چاہے وہ اسمبلی کے ہوں یا پنچایت کے ہوں کانگریس ان میں صد فیصد کامیابی حاصل کرے گی۔
وانی نے کہا کہ آج گاندھی جینتی کے موقع پر ہم نے گاندھی جی اور لال بہادر شاستری جی کو خراج عقیدت پیش کیا۔انہوں نے کہا’’ہم آج کے دن یہی پیغام دینا چاہتے ہیں کہ سب مل جل کر رہیں سیکولرزم کی بنیاد پر ہی ملک آزاد ہوا ہے۷۰برسوں تک گاندھی جی اور ان کے ساتھیوں نے آزادی کی جنگ لڑی ہے ‘‘۔
کانگریس کے یونٹ صدر کا کہنا تھا’’جب گذشتہ برسوں کے دوران ملک کے لوگ مل جل کر رہے تو ہمارا ملک دنیا کی بڑی معاشی اور فوجی طاقت بن گیا‘‘۔
وانی نے کہا کہ کانگریس گاندھی جی کے دکھائے ہوئے راستے پر چلے سیکورلزم کو زندہ رکھے گی۔