پولیس لوگوں کے دل و دماغ سے ڈر کم کرنے کیلئے کوشاں:سیوان

سرینگر//
جموںکشمیر پولیس کے سپیشل ڈائریکٹر جنرل (سی آئی ڈی) آر آر سیوان کا کہنا ہے کہ پولیس عام لوگوں کے دل و دماغ سے خوف وڈر کو کم کرنے کی ہر ممکن کوشش کر رہی ہے ۔
سیون نے کہا کہ پولیس عوام کے لئے اور عوام کے ساتھ ایک منظم دشمن کے خلاف بر سر پیکار ہے ۔
سپیشل ڈائریکٹر نے ان باتوں کا اظہار پیر کے روز جموں وکشمیر پولیس کی طرف سے منعقدہ بڑے میگا میرا تھن کے موقعہ پر نامہ نگاروں کے ساتھ بات کرنے کے دوران کیا۔
سیوان نے کہا’’جموںکشمیر پولیس ایک ایسی فورس ہے جو ایک ایسے منظم دشمن جو باہر سے طاقت بٹورتا ہے اور اندرونی طور پر مضبوط ہونے کی کوشش کرتا ہے ،کے خلاف عوام کیلئے اور عوام کے ساتھ لڑ رہی ہے ‘‘۔
سپیشل ڈی جی کا کہنا تھا’’کچھ لوگ، جو تشدد کو فروغ دیتے ہیں، کے خلاف لڑنے کیلئے خاص بہادری کا ہونا ضروری ہے جس سے جموں وکشمیر پولیس سرشار ہے ‘‘۔
سیوان نے کہا’’ہم یہ جنگ خاموشی سے دور گائوں میں رہنے والے ایک شخص، چھوٹے سرکاری ملازم، صحافی، وکیل، خطیب کے لئے لڑ رہے ہیں‘‘۔
پولیس کے خصوصی ڈائریکٹر جنرل نے کہا کہ گاندھی جی نے ہمیشہ عدم تشدد کو فروغ دیا ہے ۔انہوں نے کہا’’ہمیں امن پسند لوگوں اور ان لوگوں جن کا مقصد تشدد ہے ، کے درمیان فرق کرنا ہوگا‘‘۔
سیوان کا کہنا تھا’’لہذا ہماری جنگ ان لوگوں کے خلاف ہے جو تشدد کو فروغ دے رہے ہیں ہماری جنگ عام لوگوں کے لئے ہے اور ہماری کوشش لوگوں کے دل و دماغ سے ڈر کو کم کرنا ہے ۔‘‘