زوجیلا پر تازہ برف باری‘میدانی علاقوں میں بارشیں

سرینگر//
وادی کشمیر کے اوپری پہاڑوں پر تازہ برف باری کی وجہ سے درجہ حرارت میں کمی واقع ہوئی ہے ۔
معلوم ہوا ہے کہ سیاحتی مقام سونہ مرگ کے ساتھ ساتھ زیرو پوائنٹ ، بالہ تل ، گگن گیر ، کلن اور گنڈ میں اتوار دیر رات موسم نے کروٹ بدلی جس کے ساتھ ہی بارشوں کا سلسلہ شروع ہوا ۔
مقامی ذرائع نے بتایا کہ سونہ مرگ اور زوجیلا کے پہاڑوں پر درمیانی شب تازہ برف باری ہوئی جس وجہ سے میدانی علاقوں میں سردی کی شدت میں اضافہ دیکھنے کو ملا ہے ۔
دریں اثنا محکمہ موسمیات کے سربراہ سونم لوٹس نے پیر کے روز بتایا کہ کشمیر میں۹؍اور۱۰؍اکتوبر کو درمیانی درجے کی بارشوں کا امکان ہے ۔
لوٹس نے بتایا کہ اس دوران پہاڑی علاقوں میں برف و باراں اور میدانی علاقوں میں بارشیں متوقع ہے ۔
اس دوران محکمہ موسمیات نے وادی کشمیر میں اگلے ایک ہفتے کے دوران وسیع پیمانے پر برف باری یا بارشوں کو خارج از امکان قرار دیتے ہوئے ۸؍اکتوبر تک موسم کو فصل کٹائی کیلئے ساز گار قرار دیا ہے ۔
ادھر وسطی کشمیر کے ضلع گاندربل میں واقع سیاحتی مقام سونہ مرگ کے پہاڑوں اور زوجیلا پر دوران شب رواں سیزن کی دوسری برف باری ہوئی جبکہ جنوبی کشمیر کے کچھ حصوں کے علاوہ شمالی کشمیر کے بانڈی پورہ میں وقفے وقفے سے بارشیں ہوئیں۔
متعلقہ محکمے کے ایک ترجمان نے بتایا کہ وادی کشمیر میں۲؍اکتوبر کو جزوی طور پر آلود رہ سکتا ہے ۔
ترجمان نے کہا کہ بعد ازاں وادی میں۳سے۸؍اکتوبر موسم مجموعی طور پر خشک مگر جزوی ابر آلود رہنے کا امکان ہے ۔ان کا کہنا تھا کہ اس کے بعد۹سے۱۵؍اکتوبر تک وادی میں کہیں کہیں ہلکی سے درمیانی درجے کی بارشوں کا امکان ہے جبکہ پہاڑی علاقوں میں برف باری ہوسکتی ہے ۔
ترجمان کے مطابق وادی میں۹ اور۱۰؍اکتوبر کو بارشوں کے۶۰سے۷۰فیصد امکانات ہیں۔انہوں نے کہا کہ وادی میں ۸اکتوبر تک موسم فصل کٹائی کے لئے ساز گار ہے ۔
ان کا کہنا تھا کہ اگلے ہفتے کے دوران وسیع پیمانے پر برف باری یا بارشوں کا کوئی امکان نہیں ہے ۔