سرینگر//
فریضۂ حج کی ادائیگی کے بعد جموں کشمیر کے کم و بیش ۱۲ہزارحاجیوں کی آمد کا سلسلہ ۱۸ جولائی سے شروع ہو کر۲؍اگست کو مکمل ہو گا ۔
صوبائی کمشنر کشمیر‘وِجے کمار بدھوری نے آج اَفسروں کی ایک اعلیٰ سطحی میٹنگ طلب کی جس میں حجاج کرام کی مطلوبہ سہولیات فراہم کرنا اور اِنتظامات کا جائزہ لیا گیا ۔
حجاج کرام کا پہلا قافلہ۱۸ جولائی کو سعودی عرب سے حج کی اَدائیگی کے بعد واپس آئے گا۔
صوبائی کمشنر نے متعلقہ اَفسروں کو ہدایت دی کہ وہ حج کا فریضہ اَدا کرنے بعد سعودی عرب سے واپسی پر حجاج کرام کے اِستقبال کی سہولت فراہم کریں۔
میٹنگ میں جانکاری دی گئی کہ اِس برس جموںوکشمیر اور لداخ سے ۱۲ہزارحجاج کرام نے حج کا فریضہ اَدا کیا۔سعودی عرب سے سرینگر کیلئے واپسی حج پروازیں۱۸جولائی سے۲؍اگست تک چلیں گی۔
مجموعی طور پر۳۸ پروازیں حجاج کرام کو سعودی عرب سے یہاں لے کر آئیں گی۔ پہلے تین دِن دو پروازیں چلیں گی اور اِس کے بعد تمام حجاج کرام کی واپسی تک تین پروازیں چلیں گی۔
میٹنگ میں حج پروازوں کی آمد، اِستقبالیہ ، آمد کے اَوقات ، سامان اور آب زم زم کی ائیر لفٹنگ ، ہوم گارڈز کے رضاکاروں کی تعیناتی ، پارکنگ سہولیات ، حاضرین کو گاڑیوں کے پاس اور حجاج کرام کیلئے ٹرانسپورٹ کے اِنتظامات سے متعلق مختلف اَمور پر تبادلہ خیال کیا گیا۔
صوبائی کمشنر نے سی اِی او حج کمیٹی کو ہدایت دی کہ وہ ہوائی اَڈے میں داخل ہونے والے حجاج کرام کے حاضرین کیلئے کلر کوڈ والے پاس کو یقینی بنائیں۔ اُنہوں نے متعلقہ اَفسران کو طبی سہولیات کے قیام ، عملے کے ساتھ فائیر ٹینڈروں کی تعیناتی، ہوائی اڈے پر ٹریفک کے ضابطے کے علاوہ حج ہاؤس میں پینے کے پانی اور بجلی کی بلا تعطل فراہمی اور حج ہاؤس کے اِرد گرد مناسب صفائی ستھرائی وغیرہ کی بھی ہدایت دی۔
میٹنگ میں یہ بھی بتایا گیا کہ حجاج کرام کے اِستقبال کے لئے صرف پاس والی گاڑیوں کو ائیر پورٹ کے احاطے میں داخل ہونے کی اِجازت ہوگی ۔ اِس کے علاوہ حجا ج کرام کی سہولیت کیلئے ہوائی اَڈے پر ہوم گارڈز تعینا کئے جائیں گے۔
صوبائی کمشنر کشمیر نے اَیس اِی کسٹمز کو ہدایت دی کہ لازمی سکریننگ کیلئے ہوائی اَڈے پر کافی اَفرادی قوت کی تعیناتی کو یقینی بنایا جائے۔
بدھوری نے اَفسروں کو مزید ہدایت دی کہ وہ حجاج کرام کیلئے مناسب اِنتظامات کو یقینی بنائیں اور ان کی بغیر پریشانی سے آمد اور ان کے متعلقہ مقامات تک آسان سفر کو بھی یقینی بنائیں۔
صوبائی کمشنر کشمیر نے جے اینڈ کے آر ٹی سی اَفسروں کو ہدایت دی کہ وہ حجاج کرام کی ٹرانسپورٹیشن کیلئے مناسب تعداد میں بسیں مہیا کریں۔
