نئی دہلی// عام آدمی پارٹی (اے اے پی) کے لیڈر اور رکن پارلیمنٹ سنجے سنگھ نے منگل کو بدعنوانی کے معاملے پر بی جے پی پر طنز کرتے ہوئے کہا کہ بھارتیہ جنتا پارٹی (بی جے پی) کی واشنگ مشین انتخابات سے قبل اوور ٹائم کام کر رہی ہے ۔
مسٹر سنگھ نے آج یہاں ایک پریس کانفرنس سے خطاب کرتے ہوئے الزام لگایا کہ وزیر اعظم نریندر مودی نے حال ہی میں بھوپال میں ضمانت دی تھی کہ وہ ہر بدعنوان شخص کے خلاف کارروائی کریں گے اور اب وہ بی جے پی کی قیادت والی حکومت میں ایسے لوگوں کو وزیر بنا رہے ہیں۔ انہوں نے کہا کہ مسٹر مودی نے نیشنلسٹ کانگریس پارٹی (این سی پی) کے لیڈر اجیت پوار پر 70,000 کروڑ روپے کے گھپلے کا الزام لگایا، لیکن اب انہیں مہاراشٹر کا نائب وزیر اعلیٰ بنا دیا ہے ۔
انہوں نے بی جے پی پر انہی این سی پی لیڈروں سے ہاتھ ملانے پر تنقید کی جن پر وزیر اعظم نے چند دن پہلے بدعنوانی کا الزام لگایا تھا۔ انہوں نے کہا کہ بی جے پی کے کئی لیڈروں کو مسٹر مودی کی ‘واشنگ مشین’ سے صاف کرایا گیا ہے ۔
انہوں نے الزام لگایا کہ یہ واضح ہے کہ مودی حکومت بدعنوان لیڈروں کو پارٹی میں شامل کرنے کے لئے ای ڈی ۔سی بی آئی کا استعمال کر رہی ہے ۔ انہوں نے زور دے کر کہا کہ ان ایجنسیوں کا استعمال ہر ان چیزوں کو تباہ کرنے کے لیے کیا جا رہا ہے جو ہندوستان کو جمہوری بناتی ہیں۔