نئی دہلی// دہلی کے وزیر اعلی اروند کیجریوال نے کہا کہ لیفٹیننٹ گورنر (ایل جی) وی کے سکسینہ اور مرکزی حکومت کے پاس دہلی میں امن و امان کی صورتحال کو بہتر بنانے کے لیے کوئی ٹھوس منصوبہ نہیں ہے ۔
مسٹر کیجریوال نے دہلی میں امن و امان کی بگڑتی ہوئی صورتحال پر منگل کو ایک بار پھر مرکزی حکومت اور لیفٹیننٹ گورنر کو گھیرا۔ انہوں نے کہا کہ مرکزی حکومت کی غلط ترجیحات کی وجہ سے دہلی میں انارکی کی صورتحال پیدا ہو گئی ہے ۔ لیفٹیننٹ گورنر اور مرکزی حکومت کے پاس دہلی میں امن و امان کی صورتحال کو بہتر بنانے کے لیے کوئی ٹھوس منصوبہ بندی نہیں ہے ۔ پوری دہلی میں جنگل راج ہوگیا ہے اور لوگ خود کو غیر محفوظ محسوس کر رہے ہیں۔ انہوں نے کہا کہ اگر مرکزی حکومت سے دہلی کا لاء اینڈ آرڈر نہیں سنبھل رہا ہے تو پولیس ہمیں دے دیں۔ ہم دہلی کو ملک کا سب سے محفوظ شہر بنا کر دکھائیں گے ۔
انہوں نے کہا کہ دہلی میں جرائم کے بڑھتے ہوئے واقعات کے پیچھے صرف ایک وجہ ہے کہ مرکزی حکومت اور لیفٹیننٹ گورنر 24 گھنٹے صرف دہلی حکومت کے کاموں کو روکنے میں اپنی پوری طاقت استعمال کر رہے ہیں۔ وہ دن رات اس بات میں لگے ہوئے ہیں کہ دہلی حکومت کے محلہ کلینک، پانی اور بجلی کی فراہمی کو کیسے روکا جائے ۔
وزیر اعلیٰ نے ٹویٹ کیا کہ مرکزی حکومت کے پاس دہلی میں امن و امان کی صورتحال کو بہتر بنانے کے لیے کوئی ٹھوس منصوبہ نہیں ہے ۔ صرف میٹنگ کرنے سے مسئلہ حل نہیں ہوگا۔ دہلی میں دن دہاڑے سڑکوں پر کھلے عام لوٹ مار ہو رہی ہے ۔ اگر مرکزی حکومت سے امن و امان نظام نہیں سنبھل رہا ہے تو پولیس ہمارے حوالے کر دیں۔ ہم دہلی کو محفوظ بنا کر دکھائیں گے ۔
