ایک لاکھ روپے وصول کرنے کا الزام، بھاجپا لیڈر کے خلاف مقدمہ درج

سرینگر//
جموں کشمیر پولیس نے بی جے پی کے ضلع صدر بانڈی پورہ اور اس کے سرپنچ ساتھی کے خلاف ایک خاتون سے جیل میں بند اس کے بھائی کو رہا کرانے کے بدلے مبینہ طورایک لاکھ روپے وصول کرنے کے الزام میں مقدمہ درج کیا ہے ۔
ذرائع نے بتایا کہ بی جے پی کے ضلع صدر بانڈی پورہ عبدالرحمان ٹکری اور اس کے سرپنچ ساتھی مشتاق احمد نے ایک خاتون سے اس کے بھائی کو جیل سے رہا کرانے کیلئے مبینہ طو رپرایک لاکھ روپے وصول کیا تھا۔
دریں اثنا ایک پولیس عہدیدار نے واقعے کی تصدیق کرتے ہوئے کہا کہ پولیس کو ایک شکایت موصول ہوئی کہ انجم خورشید سے اس کے بھائی عاقب خورشید جو گذشتہ دس پندرہ دنوں سے بند تھا، کی رہائی کے لئے مذکورہ بی جے پی ضلع صدر اور اس کے سرپنچ ساتھی نے ایک لاکھ روپے وصول کیا۔
عہدیدار نے کہا کہ شکایت گذار کے مطابق مذکورہ نوجوان اہل خانہ کی طرف سے عدالت سے ضمانت حاصل کرنے پر ہی رہا ہوگیا جس کے بعد انہوں نے ان سے پیسے واپس مانگا لیکن انہوں نے دینے سے انکار کیا۔
پولیس عہدیدار نے کہا کہ شکایت موصول ہونے پر اس ضمن میں متعلقہ دفعات کے تحت ۱۷؍پریل۲۰۲۲کو ایک کیس درج کیا گیا اور تحقیقات شروع کی گئی۔انہوں نے کہا کہ تحقیقات کے دوران ملزموں سے رقم بھی ضبط کی گئی اور دونوں کو پوچھ گچھ کے بعد پیشگی ضمانت پر رہا بھی کیا گیا۔