اننت ناگ سڑک حادثے میں دو سرکاری ملازمین ہلاک

سرینگر//
جنوبی ضلع اننت ناگ کے رین چوگنڈ ویری ناگ میں محکمہ جل شکتی کا واٹر ٹینکر ڈرائیور کے قابو سے باہر ہوکر گہری کھائی میں جاگرا جس کے نتیجے میں ڈرائیور سمیت دو ملازمین کی برسر موقع ہی موت واقع ہوئی۔
سرکاری ذرائع نے بتایا کہ جمعے کے رو ز رین چوگنڈ ویری ناگ میں محکمہ جل شکتی کا واٹر ٹینکر حادثے کا شکار ہوا جس وجہ سے ڈرائیور اور ہیلپر شدید طور پر زخمی ہوئے ۔انہوں نے بتایا کہ زخمیوں کو طبی امداد کی خاطر نزدیکی ہسپتال منتقل کیا گیا تاہم ڈاکٹروں نے دو نوں کو مردہ قرار دیا۔
متوفین کی شناخت ڈرائیور گوہر احمد لون اور ہیلپر وزیر احمد خان کے بطور ہوئی ہے ۔
دریں اثنا پولیس نے معاملے کی نسبت کیس درج کرکے مزید تحقیقات شروع کی۔
اس دوران جنوبی ضلع شوپیاں کے وہیل گاوں میں دو گاڑیوں کے درمیان آپسی ٹکر کے نتیجے میں لوڈ کیرئیر ڈرائیور کی برسر موقع ہی موت واقع ہوئی۔
اطلاعات کے مطابق جمعے کے روز وہیل شوپیاں میں اس وقت سنسنی کا ماحول پھیل گیا جب ایک نجی گاڑی اور لوڈ کیرئیر کے درمیان زور دار ٹکر ہوئی جس کے نتیجے میں لوڈ کیئر یر ڈرائیور شدید طورپر زخمی ہوا۔
معلوم ہوا ہے کہ آس پاس موجود لوگوں نے زخمی ڈرائیور کو ہسپتال پہنچایا تاہم وہاں پر تعینات ڈاکٹروں نے اسے مردہ قرار دیا۔
پولیس نے معاملے کی نسبت کیس درج کرکے مزید تحقیقات شروع کی۔
ادھرجنوبی کشمیر کے اونتی پورہ میں سری نگر جموں شاہراہ پر نو روز قبل سڑک حادثے میں زخمی سیاح جمعے کے روززخموں کی تاب نہ لا کر چل بسا۔
اطلاعات کے مطابق۲۵مئی کے روز اونتی پورہ میں ایک گاڑی کو حادثہ پیش آیا جس کے نتیجے میں چار افراد زخمی ہوئے ۔
آس پاس موجود لوگوں نے زخمیوں کو صدر ہسپتال سری نگر منتقل کیا تاہم جمعے کے روزایک سیاح زخموں کی تاب نہ لا کر چل بسا۔
متوفی کی شناخت پردیپ کمار ساکن مغربی بنگال کے بطور ہوئی ہے ۔پولیس نے اس سلسلے میں پہلے ہی ایک مقدمہ درج کیا ہے ۔