سرینگر//
سرینگر جموں قومی شاہراہ پر ایک بار پھر ضلع رام بن میں مٹی کے تودے گر آنے سے شاہراہ پر ٹریفک کی نقل و حمل بند کر دی گئی تھی تاہم کئی گھنٹوں کے بعد شاہراہ کو بحال کر دیا گیا۔
یاد رہے کہ ضلع رام بن میں بھی ڈھلواس کے مقام پر مٹی کے تودے گر آنے سے حکام نے چنانی ناشری اور بانہال میں گاڑیوں کو روک کر ٹریفک کی بحالی کا کام شروع کر دیا تھا۔
ادھر، حکام نے سرینگر جموں شاہراہ پر سفر کرنے سے قبل ٹریفک محکمہ سے رجوع کرکے ٹریفک کی جانکاری حاصل کرنے کی سختی سے تلقین کی ہے۔
ٹریفک حکام نے بتایا کہ سرینگر جموں قومی شاہراہ پر صبح قریب گیارہ بجے اس وقت ٹریفک کی نقل و حمل بند کر دی گئی جب ضلع رام بن کے ڈھلواس علاقے میں مٹی کے تودے گر آئے اور چٹانیں کھسک آئیں۔ انہوں نے کہا ہک شاہراہ کی بحالی کے لیے مشینری کے ساتھ ساتھ افرادی قوت کو بھی کام پر لگا دیا گیا اور چنانی، چندر کورٹ، رام سو اور بانہال میں بڑی تعداد میں گاڑیاں در ماندہ ہو کر رہ گئی تھی۔
ٹریفک حکام نے کہا کہ قریب چار گھنٹوں کی مشقت کے بعد شاہراہ پر ٹریفک کی نقل و حمل بحال ہو گئی۔ تاہم انہوں نے عوام الناس سے شاہراہ پر سفر کرنے سے قبل متعلقہ حکام سے رجوع کرنے کی تلقین کی ہے۔
یاد رہے کہ گزشتہ کئی دنوں سے لگاتار بارشوں، ژالہ باری کے سبب نہ سرینگر جموں قومی شاہراہ سمیت سرینگر لیہہ اور تاریخی مغل شاہراہ کو بھی ٹریفک کی نقل و حمل کیلئے عارضی طور بند کر دیا گیا تھا۔
منگل شام کو مٹی کے تودے گر آنے سے مغل شاہراہ کو ٹریفک کی نقل و حرکت کے لیے بند کر دیا گیا اور شاہراہ کی بحال کا کام سرعت کے ساتھ جاری ہے۔
ادھر جنوبی کشمیر کے ضلع شوپیاں کو صوبہ جموں کے پونچھ اور راجوری اضلاع کے ساتھ جوڑنے والے تاریخی مغل روڈ مسلسل بند ہے ۔
بتادیں کہ قومی شاہراہ کے بند ہونے سے اہلیان وادی کو گونا گوں مشکلات سے دوچار ہونا پڑتا ہے ۔لوگوں کا کہنا ہے کہ قومی شاہراہ کے بند ہوتے وادی کے بازاروں میں گراں بازار آسمان چھونے لگتی ہے اور اشیائے ضروریہ کی قلت بھی پیدا ہوجاتی ہے ۔
