سرینگر/۱۵مئی
سرینگر میونسپل کارپوریشن کے کمشنر اور سمارٹ سٹی پروجیکٹ کے چیف ایگزیکٹیو افسر (سی ای او)‘ اطہر عامر خان کا کہنا ہے کہ جی ٹونٹی ورکنگ گروپ اجلاس کے پیش نظر کئی پروجیکٹوں کو ترجیحی بنیادوں پر لیا گیا تھا جن کی تعمیر کا کام لگ بھگ مکمل ہوچکا ہے یامکمل ہونے کو ہے ۔
خان نے کہا کہ گھنٹہ گھر کی تعمیر کا کام بھی اس اجلا س سے قبل ہی مکمل کیا جائے گا۔
سی ای او نے ان باتوں کا اظہار پیر کو یہاں نامہ نگاروں کے سوالوں کے جواب دینے کے دوران کیا۔
خان نے کہا”گھنٹہ گھر بھی جی ٹونٹی اجلاس سے پہلے ہی تیار ہوگا اور اس اجلاس کے لئے جتنے بھی پرجیکٹوں کو ترجیحی بنیادوں پر لیا گیا تھا وہ تمام یا تو مکمل ہوچکے ہیں یا مکمل ہونے کو ہیں“۔
سی ای اوکا کہنا تھا”ائیر پورٹ روڈ، فلائی اوور کی تزئین و آرائش، سٹی میں روشنیوں کا انتظام وغیرہ تھا، اس کام کو مکمل کیا جا چکا ہے اور پولو ویو مارکیٹ کا افتتاح بھی کیا گیا ہے اور دیگر کام بھی مکمل کئے جاچکے ہیں“۔
سی ای او نے کہا کہ ہم نے شیڈول شدہ تمام کام مکمل کئے ہیں۔انہوں نے کہا کہ سمارٹ سٹی کے۱۲۰پرجیکٹوں میں سے اس وقت ۷۰پرجیکٹوں پر کام چل رہا ہے ۔ان کا کہنا تھا کہ کچھ پروجیکٹ سال رواں کے جون تک مکمل ہوجائیں گے جبکہ بیشتر پروجیکٹوں کا تعمیری کام ماہ دسمبر تک پایہ تکمیل کو پہنچے گا۔
خان نے کہا کہ۱۶پروجیکٹ ایسے ہیں جو دسمبر ۲۰۲۳سے لے کر جون۲۰۲۴تک مکمل ہوجائیں گے ۔انہوں نے کہا کہ ان پرجیکٹوں کو مکمل کرنے کے لئے جون۲۰۲۴کی ڈیڈ لائن دی گئی ہے تب تک تمام پرجیکٹوں کو مکمل کیا جائے گا۔
ایک سوال کے جواب میں ان کا کہنا تھا کہ روز گار کے تحفظ کو یقینی بنانا بھی ہماری ذمہ داری ہے اور تجاوزات کو منیج کرنا بھی ہمارا فرض ہے ۔
