پانچ ملی ٹینٹ معاونین کے خلاف چارج شیٹ پیش

سرینگر//
سٹیٹ انوسٹی گیشن یونٹ (ایس آئی یو) نے سرینگر کی این آئی اے عدالت میں پانچ ملی ٹینٹ معاونین کے خلاف چارج شیٹ پیش کی۔
پولیس کے ایک ترجمان نے بتایا کہ ایف آئی آر زیر نمبر۴۱کے سلسلے میں ایس آئی یو نے سرینگر کی خصوصی عدالت میں چارج شیٹ دائر کی۔انہوں نے بتایا کہ ۲۰نومبر۲۰۲۲کو ناربل سرینگر شاہراہ پر۲آر آر‘۴۴بٹالین سی آر پی ایف اور جموں وکشمیر پولیس نے ناکہ چیکنگ کے دوران تین ملی ٹینٹ معاونین جن کی بعد میں شناخت روف سفیر ڈار ولد عبدالرشید ڈار ساکن کھانڈے محلہ پٹن، جاوید احمد کھانڈے ولد غلام حسن کھانڈے ساکن کھانڈے محلہ پٹن اور محمد اقبال دھوبی ولد منظور احمد ساکن ارم محلہ پٹن کے بطور ہوئی ہے کی گرفتاری عمل میں لائی۔
ترجمان نے بتایا کہ گرفتار شدگان سرگرم دہشت گرد حمزہ جو کہ لشکر طیبہ کے ساتھ وابستہ ہے کی ہدایت پر سری نگر سے پٹن اسلحہ وگولہ بارود لے جارہے تھے۔انہوں نے بتایا کہ کیس کی مزید تفتیش کی گئی جس کے نتیجے میں دیگر دو دہشت گردوں کے ساتھیوں کو نامزد کیا گیا جن میں شاکر احمد زرگر عرف نثار احمد زرگر ساکن کھانڈے محلہ پٹن اور وارث رمضان گوجری ولد رمضان گوجری ساکن ملہ پورہ پٹن اور دہشت گرد حمزہ شامل ہیں۔
ترجمان نے بتایا کہ اس کیس کی تحقیقات مکمل کرکے آج پانچ ملی ٹینٹ معاونین کے خلاف سی آر پی سی کی دفعہ ۱۷۳کے تحت این آئی اے کی کورٹ میں چارج شیٹ پیش کیا گیا۔ان کے مطابق اس کیس کی اب ۱۷۳(۸)سی آر پی سی کے تحت تحقیقات کا آغاز کیا چکا ہے۔