ضلع کپوارہ میں ۱۴غیر حاضر ملازمین معطل

کپواڑہ//
ڈپٹی کمشنر (ڈی سی) کپواڑہ ڈاکٹر ڈویفوڈ ساگر دتاترے نے آج مختلف سرکاری دفاتر کا اچانک معائنہ کیا تاکہ اے سی ڈی آفس، اے سی پی آفس، ایگزیکٹیو انجینئر آر ای ڈبلیو، تحصیلدار آفس کپواڑہ، جے کے ای ڈی آئی سمیت افسران کی حاضری کی جانچ کی جاسکے۔
اچانک دورے کے دوران ڈی سی نے ۱۴؍اہلکاروں کو غیر مجاز طور پر اپنی ڈیوٹیوں سے غیر حاضر پایا اور انہیں معطل کر دیا۔ ان اہلکاروں میں محکمہ دیہی ترقی کے۱۱؍اور تحصیلدار آفس کپواڑہ کے ۳؍اہلکار شامل ہیں۔
دورے کے دوران ڈی سی نے محکموں کی طرف سے کئے گئے کام کے بارے میں بھی دریافت کیا۔ انہوں نے افسران اور ملازمین پر بھی زور دیا کہ وہ اپنی ڈیوٹی میں وقت کی پابندی کریں۔
ڈی سی نے تحصیل آفس کپواڑہ کے ریکارڈ روم کا بھی معائنہ کیا جس کے دوران انہوں نے پرانے ریکارڈ کو طریقہ کار کے مطابق ٹھکانے لگانے کی ہدایت دی تاکہ تازہ ترین ریکارڈ کی دیکھ بھال کیلئے مناسب جگہ مہیا کی جا سکے۔