سرینگر/یکم مئی
معاشرے سے منشات کی بدعت کے قلع قمع کو یقینی بنانے کےلئے جنگ کو جاری رکھتے ہوئے بارہمولہ پولیس نے ایک انتہائی مطلوب منشیات فروش کو گرفتار کرکے اس کی تحویل سے نشہ آور مواد بر آمد کیا ہے ۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ ڈی ایس پی ہیڈ کوارٹر‘ سجاد بخاری کی نگرانی میں ایک پولیس ٹیم نے خوشحال پورہ دلنہ کے نزدیک ناکہ چیکنگ کے دوران ایک انتہائی مطلوب منشیات فروش کو گرفتار کیا۔
ترجمان نے کہا کہ یہ منشیات فروش ایک سکارپیو گاڑی میں دلنہ کی طرف آ رہا تھا اور اس کو ناکہ چیکنگ پر روکا گیا۔
بیان میں کہا گیا”تلاشی کے دوران اس کی تحویل سے 10 گرام ممنوعہ کوکین اور 15 گرام چرس جیسا مواد بر آمد کیا گیا“۔
منشیات فروش کی شناخت جلیل احمد شاہ ولد نذیر احمد شاہ ساکن کانسی پورہ کے بطور کی گئی ہے ۔انہوں نے کہا کہ مذکورہ منشیات فروش کو حراست میں لیا گیا اور اس کی گاڑی کو ضبط کیا گیا۔
بیان کے مطابق اس ضمن میں این ڈی پی ایس ایکٹ کے تحت ایک کیس درج کرکے مزید تحقیقات شروع کی گئیں۔
