جموں//
جموںکشمیر ہائوسنگ بورڈ پردھان منتری آواس یوجنا (پی ایم اے وائی) مشن کے تحت ملک کے مختلف حصوں سے عارضی یا مستقل طور جموں ہجرت کرنے والے شہریوں کو ۳۳۶فلیٹس الاٹ کرے گا۔
بورڈ ذرائع کے مطابق جموں کے سنجوان علاقے میں سستے رینٹل ہائوسنگ کمپلیکس بن رہے ہیں اور ملک کے شہریوں، جنہوں نے پردھان منتری آواس یوجنا (پی ایم اے وائی) مشن کے تحت ملازمت، تعلیم یا طویل المدتی سیاحتی دورے کیلئے جموں ہجرت کی ہے‘کو۳۳۶فلیٹس الاٹ کئے جائیں گے ۔
ذرائع نے کہا’سستی رینٹل ہائوسنگ کمپلیکسز‘کے نام سے موسوم اس اسکیم کے تحت ای ڈبیلو ایس ایل آئی جی شہری تارکین وطن بشمول مزدور، شہر کے غریب لوگ (ریڑی بان، رکشہ چلانے والے دیگر خدمات فراہم کرنے والے )، صنعتی کارکنان، بازار میں کام کرنے والے تارکین وطن، تجارتی انجمنوں،تعلیمی و صحت اداروں، طالب علموں، طویل المدتی سیاحوں وغیرہ کیلئے کرایہ پر مکان فراہم کئے جا رہے ہیں۔
ذرائع نے بتایا کہ فلیٹ الاٹ کرنے کا عمل اگلے ماہ یعنی ماہ مئی سے شروع ہوگا اور پہلے مرحلے میں۹۶ فلیٹ الاٹ کئے جائیں گے اور بعد میں ماہ اکتوبر میںپی ایم اے وائی اسکیم کے تحت ضرورت مندوںکو۲۴۰فلیٹ الاٹ کئے جائیں گے ۔الاٹی کو بہت کم کرایہ ادا کرنا ہوگا تاہم بجلی اور پانی کا فیس الگ ادا کرنا ہوگا۔
ذرائع کا کہنا تھا’’اکثر غیر مقامی لوگ مزدوری یا دوسری مصروفیات کیلئے شہر آتے ہیں لیکن کم کمائی کی وجہ سے وہ مہنگے گھروں میں قیام نہیں کر سکتے ہیں یہ اسکیم ان لوگوں کیلئے فائدہ مند ثابت ہوگی‘‘۔
اس اسکیم سے فائدہ اٹھانے کیلئے درخواست دہندگان جے کے ہائوسنگ بورڈ کی ویب سائٹ پر آن لائن درخواست سے سکتے ہیں جس کیلئے پانچ سو روپے فیس ہے رجسٹریشن کے بعد ان کے رجسٹرڈ سیل فون پر ایک ایس ایم ایس بھیجا جائے گا۔انہوں نے کہا کہ فی الوقت۹۶فلیٹس الاٹمنٹ کے لئے تیار ہیں ہر فلیٹ کا ایک کمرہ، کیچن، ہال اور باتھ روم ہے جو پچیس برسوں کی مدت کے لئے دیا جائے گا۔ان کا کہنا تھا کہ ہر دو برس کے بعد کرایہ میں آٹھ فیصد اضافہ کیا جائے گا۔
ذرائع نے بتایا کہ درخواست دہندگان۱۵مئی تک ایپلائی کرسکتے ہیں جس کے بعد دستاویزات کی و یری فکیشن کی جائے گی۔
قابل ذکر ہے کہ یہ فلیٹس پہلے میونسپل کارپوریشن نے۲۰۱۴میں تعمیر کئے تھے لیکن کام مکمل نہ ہونے کی وجہ سے سال۲۰۲۱میں کام کے تکمیل کیلئے یہ ہائوسنگ بورڈ کو دئے گئے تھے ۔