بارہمولہ میں دو خاتون سمیت تین منشیات فروش گرفتار:پولیس

سرینگر//
منشیات کی وبا کی بیخ کنی کو یقینی بنانے کیلئے جاری مہم کو تیز تر کرتے ہوئے بارہمولہ پولیس نے دو الگ الگ کارروائیوں کے دوران دو خاتون سمیت تین منشیات فروشوں کو گرفتار کرکے ان کی تحویل سے نشہ آور مواد بر آمد کیا ہے ۔
بارہمولہ پولیس نے ٹویٹ کرتے ہوئے کہا کہ پولیس نے معمول کی گشت کے دوران بارہمولہ میں آر اینڈ بی دفتر کے نزدیک دو خاتون منشیات فروشوں کو گرفتار کیا۔
پولیس نے کہا کہ گرفتار شدگان کی تحویل سے۲سو گرام چرس جیسا نشہ آور مواد بر آمد کیا گیا۔
پولیس نے اس ضمن میں پولیس اسٹیشن بارہمولہ میں ایک کیس درج کرکے تحقیقات شروع کی ہے۔
ایک اور ٹویٹ میں کہا گیا کہ پولیس نے چینہ بل پٹن میں ناکہ چیکنگ کے دوران ایک اور منشیات فروش کو گرفتار کیا۔انہوں نے کہا کہ گرفتار شدہ منشیات فروش کی تحویل سے۵کلو خشخاش بھوسہ جیسا ممنوعہ مواد بر آمد کیا گیا۔
پولیس نے اس سلسلے میں پولیس اسٹیشن پٹن میں ایک کیس درج کرکے تحقیقات شروع کی ہیں۔
قابل ذکر ہے کہ بارہمولہ پولیس نے سال رواں کے پہلے تین مہینوں جنوری، فروری اور مارچ کے دوران۱۱۳ منشیات فروشوں کو گرفتار کرکے ان کی تحویل سے کروڑوں روپیے مالیت کا نشہ آور مواد بر آمد کیا ہے ۔