سرینگر، جموں شاہراہ مرمتی کام کے پیش نظر ۷؍اپریل کو بند رہے گی

سرینگر//
وادی کشمیر کو ملک کے باقی حصوں کے ساتھ جوڑنے والی سرینگر‘جموں قومی شاہراہ مرمتی کام کے پیش نظر۷؍اپریل یعنی جمعہ کو ٹریفک کی نقل و حمل کیلئے بند رہے گی۔
ایس ایس پی ٹریفک پولیس رام بن موہتہ شرما کی طرف سے جاری ایک بیان کے مطابق قومی شاہراہ۷؍اپریل کی صبح۶ بجے سے۸؍اپریل کی صبح۶بجے تک ضروری مرمتی کام کے پیش نظر ٹریفک کی نقل و حمل کیلئے بند رہے گی۔
بیان میں کہا گیا’جموں وکشمیر یونین ٹریٹری حکومت سے۳۱مارچ۲۰۲۳کو موصولہ ہدایات کی بنیاد پر نیشنل ہائی وے اتھارٹی آف انڈیا کی طرف سے قومی شاہراہ ضروری مرمتی کام کے پیش نظر۷؍اپریل کو ناشری ٹنل سے نو یوگا ٹنل کے درمیان ٹریفک کیلئے بند رہے گی‘۔
بیان کے مطابق اس دوران۷ ؍اپریل کی صبح سے۸؍اپریل کی صبح تک میڈیکل ایمرجنسی گاڑیوں کو چھوڑ کر کسی بھی چھوٹی یا بڑی کو گاڑی کو ناشری ٹنل سے نویوگا ٹنل کے درمیان چلنے کی اجازت نہیں ہوگی۔