شب قدر ۱۷اپریل کو منائی جائیگی :مفتی اعظم

سرینگر/ 28 مارچ
جموں و کشمیر کے مفتی اعظم‘ ناصر الاسلام نے منگل کو کہا کہ شب قدر 17 اپریل کو منائی جائے گی جبکہ 20 اپریل کو چاند نظر آنے کی صورت میں لوگوں کو ایک دن کا قضا روزہ رکھنا پڑے گا۔
علمائے کرام کے میراتھن اجلاس‘ جس میںمولانا رحمت اللہ قاسمی، غلام رسول حامی اور پروفیسر محمد طیب کاملی، مولانا آغا سید الحسن موسوی، غلام محمد بٹ، مولانا فیاض احمد رضوی، مسرور عباس انصاری اور دیگر شامل تھے‘ کے بعد صحافیوں سے گفتگو کرتے ہوئے، مفتی اعظم نے کہا”شب قدر 17 اپریل کو ہوگی، چاند کی رویت 20 اپریل کو ہوگی اور اگر چاند نظر آگیا تو لوگوں کو ایک دن کی قضا ادا کرنی ہوگی۔ عید کے بعد روزہ رکھنا“۔
اسلام نے کہا کہ عید کے حوالے سے کوئی بھی فیصلہ علمائے کرام سے مکمل مشاورت کے بعد کیا جائے گا۔ انہوں نے کہا کہ کسی بھی اعلان سے پہلے محکمہ موسمیات سے بھی مشاورت کی جائے گی۔
قابل ذکر بات یہ ہے کہ اس سے قبل روزے کو لے کر تنازعہ بھی ہوا تھا کیونکہ مفتی اعظم نے کہا تھا کہ عوام جمعہ سے روزہ رکھیں جب کہ کشمیر میں لوگوں کی اکثریت نے جمعرات سے روزہ رکھنا شروع کر دیا تھا۔ مفتی اعظم نے کہا تھا کہ انہیں بدھ کی رات رمضان کا چاند نظر آنے کے بارے میں کوئی گواہ نہیں ملا۔