سرینگر کے بشمبر نگر خانیارعلاقے میں تصادم، دو جنگجو ہلاک:آئی جی کشمیر

سرینگر/۱۰؍اپریل
جموں وکشمیر کے گرمائی دارلخلافہ سر ی نگر کے بشمبر نگر خانیارعلاقے میں سیکورٹی فورسز اور جنگجووں کے مابین تصادم آرائی میں دو جنگجو مارے گئے ۔
آئی جی کشمیر کے مطابق سرینگر میں سی آر پی ایف اہلکاروں پر ہوئے حملے میں جاں بحق جنگجو ؤںکا ہاتھ تھا۔
پولیس ذرائع نے یو این آئی اردو کو بتایا کہ سری نگر کے بشمبر نگر خانیار علاقے میں ملی ٹینٹوں کے چھپے ہونے کی اطلاع ملتے ہی سیکورٹی فورسز اور پولیس نے مشترکہ طورپر پورے علاقے کو محاصرے میں لے لیا اور اُنہیں ڈھونڈ نکالنے کے لئے گھر گھر تلاشی کارروائی شروع کی۔انہوں نے بتایا کہ جونہی سیکورٹی فورسز کے اہلکار ایک مشتبہ مقام کے نزدیک پہنچے تو وہاں پر موجود جنگجووں نے اندھا دھند فائرنگ شروع کی ۔
پولیس ذرائع کے مطابق حفاظتی عملے نے بھی پوزیشن سنبھال کر جوابی کارروائی کا آغاز کیا اور ابتدائی گولیوں کے تبادلے میں ایک جنگجو مارا گیا جس کی شناخت اور تنظیمی وابستگی کے بارے میں جانچ پڑتال شروع کی گئی ہے ۔
دریں اثنا آئی جی کشمیر وجے کمار نے بتایا کہ سری نگر کے بشبمر نگر علاقے میں تلاشی آپریشن کے دوران جنگجووں نے فورسز پر فائرنگ کی جوابی کارروائی میں دو جنگجو مارے گئے ۔انہوں نے بتایا کہ گزشتہ روز سری نگر میں سی آر پی ایف اہلکاروں پر ہوئے حملے میں جاں بحق جنگجو ؤںکا ہاتھ تھا۔