حج ۲۰۲۲:سعودی عرب نے ۱۰ لاکھ زائرین کو حج کی اجازت دے دی

سرینگر//(ندائے مشرق ڈیسک)
سعودی وزارت حج اور عمرہ نے رواں سال ۱۰ لاکھ مقامی اور غیر ملکی زائرین کو حج کی سعادت حاصل کرنے کی اجازت دے دی ہے۔
واضح رہے کہ گزشتہ دو سال کے دوران کورونا وائرس کی وجہ سے انتہائی محدود تعداد میں لوگوں کو حج کرنے کی اجازت دی گئی تھی۔
تاہم اب دنیا بھر میں وائرس کے کیسوں میں بڑی حد تک کمی اور دنیا بھر میں اکثر آبادی کی مکمل ویکسی نیشن کی بدولت اس سال بڑی تعداد میں لوگوں کو حج کی اجازت دی گئی ہے۔
سعودی وزارت حج و عمرہ کی جانب سے جاری اعلامیے کے مطابق اس سال دنیا بھر سے ۱۰ لاکھ زائرین حج کی سعادت حاصل کر سکیں گے۔
بیان میں کہا گیا کہ سعودی حکومت کیلئے بات انتہائی اہمیت کی حامل ہے کہ وہ حج زائرین کے ساتھ ساتھ مسجد نبویؐ کی زیارت کرنے والوں کی حفاظت اور سیکیورٹی کو یقینی بنائے۔ان کا کہنا تھا کہ ہمارا مقصد اس بات کو یقینی بنانا ہے کہ دنیا بھر سے زیادہ سے زیادہ مسلمان محفوظ اور روحانی ماحول میں حج اور مسجد نبویؐ کی زیارت کی سعادت حاصل کر سکیں۔انہوں نے کہا کہ دنیا بھر میں اس سال لوگ مختص کردہ کوٹے کے مطابق ہی حج کر سکیں گے جس میں انہیں صحت کے حوالے سے طے کردہ اصول و ضوابط پر عمل کرنا ہوگا۔
سعودی عرب کی وزارت حج و عمرہ نے۶۵سال سے زائد عمر کے افراد کے حج کرنے پر پابندی لگا دی ہے جبکہ حج کرنے والوں کے لیے ویکسی نیشن لازمی قرار دی گئی ہے۔
سعودی عرب سے باہر سے آنے والے افراد کو کووڈ۱۹پی سی آر ٹیسٹ کی منفی رپورٹ جمع کرانی ہوگی اور یہ رپورٹ سعودی عرب روانگی سے۷۲ گھنٹے پرانی نہ ہو۔
وزارت حج و عمرہ نے تمام زائرین سے درخواست کی ہے وہ ان ہدایات پر عملدرآمد یقینی بنائیں اور حج کی ادائیگی کے دوران صحت اور حفاظت کیلئے تمام احتیاطی تدابیر اختیار کریں۔
واضح رہے کہ ۲سال قبل وبائی مرض کووڈ ۱۹کی وجہ سے حج، عمرہ سمیت دیگر مقاصد کیلئے آنے والے شہریوں پر کورونا کی ویکسین، پی سی آر ٹیسٹ سمیت قرنطینہ کی شرائط عائد کی گئی تھیں۔
مارچ ۲۰۲۰ میں سعودی عرب نے ابتدائی طور پر مکہ مکرمہ میں مسجد الحرام اور مدینہ منورہ میں مسجد نبوی میں نمازِ عشا کے ایک گھنٹے بعد سے نمازِ فجر سے ایک گھنٹہ قبل تک روزانہ بند رکھنے کا اعلان کیا تھا۔
بعد ازاں۲۱ مارچ کو سعودی عرب کے حکام نے کورونا وائرس کے باعث جمعہ اور پانچوں وقت کی نماز میں مسجدوں میں تعداد کم کرنے کے اقدامات کرتے ہوئے مسجد نبوی سمیت دیگر مساجد کے دروازے عام نمازیوں کیلئے بند کردیے تھے۔
اس حوالے سے بتایا گیا تھا کہ’۴۰ سال میں پہلی مرتبہ عمرے کو روک دیا گیا، سعودی عرب اور خلیجی ممالک میں تمام مساجد نماز کے لیے مکمل طور پر بند کردی گئی ہیں‘۔
سعودی حکومت نے ۲۰۲۰ میں مسجدالحرام اور مسجد نبوی میں رمضان المبارک کا اعتکاف معطل رکھنے کا بھی اعلان کیا تھا۔حکومت نے ۳۰ مئی ۲۰۲۰ کو مسجد نبوی کو عوام کے لیے مرحلہ وار کھولنے کا اعلان کیا تھا لیکن تعداد محدود رکھی گئی تھی۔علاوہ ازیں کورونا وائرس کے باعث حج ۲۰۲۰؍ اور۲۰۲۱ بھی عازمین کی محدود تعداد اور کورونا پابندیوں کے ساتھ ادا کیا گیا تھا۔تاہم رواں سال۲۲ مارچ کو ہی سعودی عرب نے عمرہ زائرین سمیت تمام افراد کیلئے۲سال سے عائد کورونا پابندیاں مکمل طور پر ختم کرنے کا اعلان کردیا تھا۔