عمرہ سیزن شروع ہونے سے اب تک ۴۸ لاکھ افراد عمرہ کیلئے سعودی عر پہنچے

سرینگر// (ویب ڈیسک)
سعودی وزارت حج و عمرہ نے کہا ہے کہ امسال عمرہ سیزن کے آغاز سے اب تک ۴۸ لاکھ ۴۰ ہزار ۷۶۴ عمرہ زائرین سعودی عرب پہنچے ہیں۔
سعودی پریس ایجنسی کے مطابق وزارت نے کہا ہے کہ ’مذکورہ عمرہ زائرین فضائی، بری اور بحری راستوں سے آئے ہیں‘۔
وزارت نے کہا ہے کہ ’مناسک کی ادائیگی کے بعد اب تک ۴۲ لاکھ ۵۸ ہزار۱۵۱ عمرہ زائرین واپس جاچکے ہیں‘۔
’گزشتہ روز منگل تک مختلف ممالک سے تعلق رکھنے والے ۵ لاکھ ۸۲ ہزار ۶۱۳ عمرہ زائرین مکہ مکرمہ اور مدینہ منورہ میں موجود ہیں‘۔
وزارت نے کہا ہے کہ۴۳ لاکھ سے زیادہ عمرہ زائرین فضائی راستے سے آئے،۵ لاکھ ۷ ہزار بری راستوں سے جبکہ۳۹۸۵ زائرین بحری راستوں سے پہنچے‘۔
’فضائی راستوں سے آنے والے عمرہ زائرین میں سے۳۱ فیصد مدینہ منورہ کے شہزادہ محمد بن عبد العزیز ایئرپورٹ پہنچے جبکہ بقیہ جدہ اور ینبع ایئرپورٹ کے ذریعہ آئے‘۔
اس دوران سعودی وزارت حج و عمرہ نے اندرون ملک سے سعودی شہریوں اور مقیم غیرملکیوں کو حج خدمات فراہم کرنے والوں سے متعلق قانون کے لائحہ عمل میں ترمیم کی تجویز دی ہے۔
اس تجویز کا مقصد داخلی عازمین حج کو فراہم کی جانے والی خدمات کا معیار بہتر بنانا ہے۔
ایک میڈیا رپورٹ کے مطابق وزارت حج و عمرہ داخلی عازمین کو حج خدمات فراہم کرنے والوں سے متعلق قواعد و ضوابط تیار کر رہی ہے جن میں اس بات کی نشاندہی ہو گی کہ ایک ادارہ کتنے افراد کو حج کرا سکتا ہے۔ اس کیلئے کتنے مالیاتی و انتظامی و آپریشن وسائل ضروری ہوں گے۔
وزارت حج و عمرہ ترمیم اور قواعد و ضوابط کی منظوری سے قبل ’استطلاع‘ پورٹل کے ذریعے عوامی رائے لے گی۔
مسودے میں ایک تجویز یہ بھی ہے کہ داخلی عازمین کو سہولتیں فراہم کرنے والی کمپنیوں کو فی کس ۶۰۰ ریال زرضمانت کے طور پر جمع کرنے کا پابند بنایا جائے۔
وزارت حج و عمرہ سیزن سے پہلے داخلی معلمین کے حوالے سے ضوابط کی تیاری کے لیے کوشاں ہے۔
مسودے میں ایک اہم تجویز یہ ہے کہ اقامہ قوانین کی خلاف ورزی کرنے والوں یا حج پرمٹ نہ رکھنے والے سعودیوں اور مقیم غیرملکیوں کے ساتھ داخلی عازمین کوئی معاملہ نہ کریں۔
ایک پابندی یہ تجویز کی گئی ہے کہ داخلی معلمین میں سے کوئی اپنا لائسنس کسی اور کو استعمال کرنے کا موقع نہ دے۔ یہ پابندی بھی لگائی جا رہی ہے کہ داخلی معلم مقررہ قانون کے ضوابط کے مطابق مطلوبہ خدمات انجام دیں۔ کوٹے سے زیادہ عازمین کے ساتھ معاملات نہ کریں۔
ایک اہم ترمیم یہ رکھی جا رہی ہے کہ داخلہ، حج و عمرہ اور تجارت کی وزارتوں کے نمائندوں پر مشتمل مجلس قائمہ تشکیل دی جائے جسے داخلی عازمین کی شکایات سننے اور حل کے اختیارات حاصل ہوں۔