آفتاب مارکیٹ حکومت کی ملکیت ہے اور دکاندار کرایہ دار ہیں:یاسین خان

سرینگر//
کشمیر ٹریڈرس اینڈ منی فیکچررس فیڈریشن (کے ٹی ایم ایف)کے صدر محمد یاسین خان کا کہنا ہے کہ آفتاب مارکیٹ حکومت کی ملکیت ہے اور دکاندار صرف کرایہ دار ہیں۔
خان نے کہا کہ ان دکانوں کو جو چند روز قبل حکام نے سیل کیا تھا وہ کارروائی ایک غلط فہمی پر انجام دی گئی تھی۔
کے ٹی ایم ایف کے صدر نے جمعے کو یہاں نامہ نگاروں کے ساتھ بات کرتے ہوئے کہا’’میرا ماننا ہے کہ یہ غلط فہمی ہوئی تھی کیونکہ ہماری بیس پچیس روز پہلے ہی انتظامیہ سے بات ہوئی تھی ہم لوگ میونسپل کارپویشن کے پاس بھی گئے جنہوں نے ہمیں لکھ کے دیا کہ یہ پراپرٹی ایس ایم سی کی ہے ‘‘۔
خان نے کہا کہ اس کے بعد ہم صوبائی انتظامیہ کے پاس بھی گئے لیکن کوئی پرائیویٹ آدمی ہے جس نے ان سے کہا ہے کہ یہ ان کی پراپرٹی ہے ۔ان کا کہنا تھا’’میونسپل کارپوریشن نے لکھ کے دیا ہے کہ وہ سال۱۹۷۲سے اس کا کرایہ لے رہی ہے اور آج تک کرایہ لیا ہے وہی بات ہم نے صوبائی انتظامیہ سے کہا‘‘۔
کے ٹی ایم ایف کے صدر نے کہا کہ جب ہم نے اپنی بات رکھی تو انہوں نے کہا کہ یہ سرکار کی پراپرٹی ہے ۔انہوں نے کہا’’ہمارا ماننا ہے کہ یہ سرکار کی پراپرٹی ہے اور ہم اس کے صرف کرایہ دار ہیں‘‘۔
خان نے حکام سے اپیل کی کہ وہ اپنے ہی اس وعدے کہ چھوٹے دکانداروں کے ساتھ نہیں چھیڑا جائے گا‘پر عملدر آمد کریں۔
بتادیں کہ حکام نے چند روز قبل آفتاب مارکیٹ میں ۲۵دکانوں کو سیل کیا تھا جن کو اگلے ہی روز کھولنے کی اجازت دی گئی تھی۔