نئی دہلی//
ترنمول کانگریس (ٹی ایم سی) کے ایک لیڈر نے انفورسمنٹ ڈائریکٹوریٹ (ای ڈی) کے موجودہ ڈائریکٹر سنجے کمار مشرا کی ملازمت میں توسیع کے مرکزی حکومت کے فیصلے کو سپریم کورٹ میں چیلنج کیا ہے ۔
ٹی ایم سی کے ترجمان ساکیت گوکھلے نے سنجے مشرا کی مدت ملازمت کی توسیع کے حکم کے خلاف مفاد عامہ کی عرضی دائر کی ہے ۔ عرضی گزار کا دعویٰ ہے کہ بطور ڈائریکٹر سروس میں توسیع کا فیصلہ سنٹرل ویجیلنس کمیشن ایکٹ کے سیکشن ۲۵کی خلاف ورزی ہے ۔
درخواست میں یہ بھی دعوی کیا گیا کہ مسٹر سنجے مشرا کی ملازمت میں توسیع کا حکم ’کامن کاز بمقابلہ یونین آف انڈیا‘میں سپریم کورٹ کے فیصلے کے بھی خلاف ہے ۔
گوکھلے نے اپنی عرضی میں کہا ہے کہ۱۷نومبر۲۰۲۱کو مرکزی حکومت کی وزارت خزانہ کے ریونیو ڈپارٹمنٹ کے ذریعہ جاری کردہ ایک حکم میں مسٹر سنجے مشرا کو سروس میں توسیع دی گئی تھی۔
گوکھلے نے سپریم کورٹ سے محکمہ کے حکم کو کالعدم کرنے کی اپیل کی ہے ۔ عرضی گزار کا دعویٰ ہے کہ مشرا نے سال۲۰۱۸‘۲۰۱۹؍اور۲۰۲۰کیلئے اپنی سالانہ غیر منقولہ جائیداد کی ریٹرن(آئی پی آر)کو وقت پر اپ لوڈ نہیں کیا تھا۔
درخواست گزار نے اپنی درخواست میں ڈائریکٹوریٹ کے ایک نوٹیفکیشن کے حوالے سے کہا ہے کہ آئی آر ایس افسران کے لیے آئی پی آر اپ لوڈ کرنا لازمی ہے ۔