سرینگر/۲؍اپریل
وادی کشمیر میں درجہ حرارت مسلسل معمول سے زیادہ درج ہونے سے موسم بہار میں ہی موسم گرما جیسی گرمی محسوس کی جار ہی ہے ۔
محکمہ موسمیات کی پیش گوئی کے مطابق وادی میں اگلے چوبیس گھنٹوں کے دوران موسم خشک رہنے کا امکان ہے ۔
متعلقہ محکمے کے ایک ترجمان نے بتایا کہ وادی میں اگلے چوبیس گھنٹوں کے دوران موسم مجموعی طور پر خشک رہنے کا امکان ہے تاہم شمالی کشمیر میں ایک دو مقامات پر ہلکی بارشیں متوقع ہیں۔ انہوں نے کہا کہ بعد ازاں وادی میں۸؍اپریل تک موسم خشک رہنے کا امکان ہے ۔
ادھر وادی میں شبانہ درجہ حرارت مسلسل معمول سے زیادہ درج ہو رہا ہے ۔ گرمائی دارلحکومت سری نگر میں کم سے کم درجہ حرارت۸ء۸ڈگری سینٹی گریڈ ریکارڈ کیا گیا جو معمول سے ۰ء۲ ڈگری سینٹی گریڈ زیادہ تھا۔ وادی کے شہرہ آفاق سیاحتی مقام گلمرگ میں کم سے کم درجہ حرارت۵ء۴ڈگری سینٹی گریڈ ریکارڈ کیا گیا جو معمول سے۷ء۵ڈگری سینٹی گریڈ زیادہ تھا۔
ماہرین موسمیات کے مطابق گلمرگ کا شبانہ درجہ اس وقت منفی۸ء۰ڈگری سینٹی گریڈ ہونا چاہئے تھا۔ وادی کے دوسرے مشہور سیاحتی مقام پہلگام میں کم سے کم سے درجہ حرارت۲ء۳ڈگری سینٹی گریڈ ریکارڈ کیا گیا جو معمول سے۵ء۱ڈگری سینٹی گریڈ زیادہ تھا۔ سرحدی ضلع کپوارہ میں کم سے کم درجہ حرارت۲ء۵ڈگری سینٹی گریڈ ریکارڈ کیا گیا جو معمول سے۷ء۰ڈگری سینٹی گریڈ زیادہ ریکارڈ ہوا تھا۔ گیٹ وے آف کشمیر کے نام سے مشہور قصبہ قاضی گنڈ میں کم سے کم درجہ حرارت۲ء۶ڈگری سینٹی گریڈ ریکارڈ کیا گیا۔
دریں اثنا وادی میں ہفتے کو بھی دن بھر دھوپ چھائی رہی اور وادی کے سیاحتی مقامات بالخصوص جھیل ڈل کے کنارے پر واقع باغ گل لالہ اور دیگر مغل باغات میں سیاحوں کا غیر معمولی رش دیکھا گیا۔
وادی کے دیہی علاقوں میں بھی کسانوں کو اپنے کھیت کھلیانوں اور میوہ باغوں میں مختلف کاموں کے ساتھ مصروف عمل دیکھا جا رہا ہے ۔