یکم دسمبر سے پانچویں‘۵دسمبر سے آٹھویں‘۱۰دسمبر سے دسویں جماعت تک سرمائی تعطیلات کی تجویز

سرینگر//
وادی کشمیر میں سردیوں کی لہر تیز ہونے کے پیش نظر محکمہ تعلیم اسکولوں میں سرمائی تعطیلات کا اعلان کرنے پر غور کر رہا ہے ۔
اس ضمن میں ڈائریکٹر تعلیم کشمیر نے متعلقہ اعلیٰ حکام کو ایک تجویز بھی پیش کی جس کی رو سے یکم دسمبرسے۲۸ فروری۲۰۲۳تک پانچویں کلاس ،آٹھویں اور دسویں کلاسوں کیلئے بالترتیب ۵دسمبر اور۱۰دسمبر کی تجویز پیش کی ہے ۔
ناظم تعلیم نے اپنی تجویز میں کہاکہ درجہ حرارت نقط انجماد سے نیچے درج ہونے کے باعث طلاب کو اسکولوں میں سخت مشکلات کا سامنا کرناپڑرہا ہے ۔
یو این آئی اردو کو محکمہ تعلیم کے ایک اعلیٰ عہدیدار نے بتایا کہ ناظم تعلیم نے کمشنر سیکریٹری ایجوکیشن کو سرمائی تعطیلات کے حوالے سے تجویز پیش کی ہے ۔
تجویز میں بتایا گیا کہ چونکہ وادی کشمیر میں منفی درجہ حرارت درج ہو رہا ہے جس وجہ سے اسکولوں میں طلبہ وطالبات ٹھٹھرتی سردی میں کلاسوں کو جوائن کر رہے ہیں۔
انہوں نے مزید کہاکہ سردی کے باعث بچے بیماریوں کا شکار ہو سکتے ہیں جس کے پیش نظر سرمائی تعطیلات کا اعلان ناگزیر ہے ۔
ڈائریکٹر موصوف نے یکم دسمبر ۲۰۲۲سے۲۸ فروری۲۰۲۳تک پانچویں کلاس ، پانچ دسمبر سے۲۸فروری تک آٹھویں کلاس اور دس دسمبر سے دسویں جماعت کے کلاسوں کیلئے سرمائی تعطیلات کی تجویز بھیجی ہے ۔
ناظم تعلیمات کشمیر نے جو تجویز کمشنر سیکریٹری ایجوکیشن کو روانہ کی اُس کی ایک کاپی یو این آئی اردو کے پاس بھی ہے ۔