قصبہ اوڑی میں تیندوے نے کمسن لڑکے کو اپنا نوالہ بنایا‘ تین ماہ میں پانچواں واقعہ

سرینگر//
شمالی کشمیر کے ضلع بارہمولہ کے قصبہ اوڑی میں جمعرات کی شام تیندوے نے سات سالہ کمسن لڑکے کو اپنا نوالہ بنایا۔
یہ اوڑی علاقے میں گذشتہ تین ماہ کے دوران اس نوعیت کا پیش آنے والا پانچواں واقعہ ہے ۔
سرکاری ذرائع نے بتایا کہ جمعرات کی شام اوڑی کے مالی ناگ مہک علاقے سے آدم خور تیندوے نے سات سالہ کمسن لڑکے کو اُٹھا لیا اور اس کو جنگل میں لے گیا۔
کمسن لڑکے کی شناخت علی حسین ولد عباس حسین کے بطور ہوئی ہے ۔انہوں نے کہا کہ واقعہ پیش آتے ہی اہلخانہ نے شو رغل مچایا لیکن بچی کو تیندے کی پکڑ سے بچانے میں کامیاب نہیں ہوسکے ۔
ذرائع کا کہنا تھا کہ بعد ازاں ایک پولیس پارٹی اور مقامی لوگوں نے بچی کی تلاش شروع کی اور کافی محنت و مشقت کے بعد اس کی لاش کو رات دیر گئے بر آمد کیا گیا۔
قابل ذکر ہے کہ سال رواں کے۱۱جون کو اوڑی کے ہی ترکانجن علاقے میں تیندے نے ایک بچی کو مار ڈالا تھا جبکہ اس کے ایک دن بعد ایک اور بچہ تیندوے کا شکار ہوا تھا اور۱۴جون کو اسی علاقے میں ایک اور کمسن بچے کو اپنا نوالہ بنایا تھا۔
رواں ماہ سولہ ستمبر کو اوڑی میں ہی چھ سالہ بچی کو تیندوے نے اپنا نوالہ بنایا تھا۔
ذرائع کے مطابق سال رواں کے دوران سات بچوں سمیت ایک درجن کے قریب افراد کو جنگلی جانوروں نے اپنا نوالہ بنایا ہے ۔