سرینگر/۲۲مارچ
جموں کشمیر کے لیفٹیننٹ گورنر‘ منوج سنہا کا کہنا ہے کہ یونین ٹریٹری کی انڈسٹریل اسکیم ملک کی سب سے بہترین اسکیم ہے ۔
سنہا نے کہا کہ اس اسکیم کے باعث ملک کے بڑے صنعت کاروں کی جموں وکشمیر کی طرف دلچسپی بڑھ گئی ہے ۔ان کا کہنا تھا کہ گذشتہ دو برسوں سے یونین ٹریٹری میں بڑے پیمانے پر بدلاؤ کا دور شروع ہوا ہے ۔
لیفٹیننٹ گورنر نے ان باتوں کا اظہار منگل کے روز یہاں شیر کشمیر انٹرنیشنل کنونشن کمپلیکس (ایس کے آئی سی سی) میں منعقدہ خلیجی ممالک کے انوسٹ منٹ سمٹ’سے خطاب کے دوران کیا۔
سنہا نے کہا’’گذشتہ دو برسوں سے جموں وکشمیر میں بدلاؤ کے دور کا آغاز ہوا ہے ‘‘۔
ان کا کہنا تھا’’جموں و کشمیر کی آج کی انڈسٹریل اسکیم ملک کی سب سے بہترین اسکیم ہے جس کی وجہ سے ملک کے بڑے بڑے سرمایہ کارروں کی جموں کشمیر کی طرف دلچسپی بڑھ گئی ہے ‘‘۔
لیفٹیننٹ گورنر نے کہا کہ سال گذشتہ یہاں پندرہ ہزار کروڑ کی سرمایہ کاری ہوئی تھی جبکہ اس سال ہم نے ۲۷ہزار کروڑ کی سرمایہ کاری کے پرپوزل کو کلیئر کیا ہے جو آنے والے چھ مہینوں نے میں۷۰ہزار کرور رپے کی سرمایہ کاری کو پار کرے گا۔
سنہا نے کہا کہ خلیجی ممالک کی بڑی کمپنیوں کے سی ای اوز کے دورہ جموںکشمیر سے ان ممالک اور یونین ٹریٹری کے درمیان تجارت کرنے کیلئے اعتماد کا ایک ماحول پیدا ہوگا۔سنہا کا کہنا تھا کہ حکومت سرمایہ کاروں کیلئے تمام تر سہولیات کو دستیاب رکھنے کی وعدہ بند ہے ۔
لیفٹیننٹ گورنر نے کہا کہ سرمایہ کاری سے جموں وکشمیر کی ہمہ گیر ترقی ہوگی اور روز گار کے موقعے بڑھ جائیں گے ۔انہوں نے کہا کہ خیلجی ممالک کے ساتھ بھارت کے تجارتی تعلقات کافی بڑھ رہے ہیں جس سے جموں وکشمیر کی دستکاری کی چیزوں کو عالمی سطح پر مزید فروغ ملے گا۔
سنہا کا کہنا تھا کہ سال رواں کے ماہ جنوری میں میرے دوبئی دورے کے دوران متحدہ عرب امارات کی کئی کمپنیوں نے جموں وکشمیر کے لئے تجارت کے طویل المدتی منصبوں کے اعلان کئے ۔
ایل جی نے کہا کہ ہم ان تجارتی تعلقات کو نئی بلندیوں تک لے جائیں گے ۔انہوں نے کہا کہ ہماری کوششوں کے نتیجے میں یہاں بعض کمپنیوں نے کام شروع کیا ہے ۔ان کا کہنا تھا کہ ہم جموں وکشمیر کو سرمایہ کاری کی سب سے بہترین جگہ بنائیں گے ۔
سنہا نے جموں و کشمیر میں ہونے والی تیز رفتار سماجی و اقتصادی تبدیلیوں کے بارے میں بات کرتے ہوئے کہا کہ حکومت نے فزیکل اور سماجی بنیادی ڈھانچے کی ترقی کیلئے کئی بڑے اقدامات شروع کئے ہیں اور ان میں سے کچھ اقدامات۱۹۴۷ میں ملک کی آزادی کے بعد سے اب تک کے سب سے بڑے ہیں ۔
لیفٹیننٹ گورنر نے کہا کہ پاور سیکٹر کی ترقی ، تجارت، باغبانی ، دیہی انفراسٹرکچر ، سڑکیں اور ہوائی رابطے ، طبی تعلیم اور صحت کی خدمات ، صنعتی تربیتی ادارے ، انفارمیشن ٹیکنالوجی اور پیداوار کے ذخیرہ کرنے کی سہولیات وہ متنوع شعبے ہیں جن پر توجہ دی گئی ہے ۔
سنہا نے کہا کہ مخصوص صنعتی املاک اور صنعتی پارکس کو فروغ دیا جا رہا ہے اس کے علاوہ ایک سنگل ونڈو پورٹل کو شروع کیا جا رہا ہے جو تمام منظوریوں اور اجازتوں کو مقررہ مدت میں حاصل کرنے کیلئے یک باری حل ہے ۔
لیفٹیننٹ گورنر نے کہا کہ ہمارے سنگل ونڈو پورٹل پر اب تک تقریباً ۱۳۰ خدمات فعال ہیں ۔ انہوں نے مزید کہا کہ ہم نے بے کار تعمیل کو ختم کر کے یو ٹی میں کاروبار کرنے میں آسانی کیلئے عمل کو ہموار کر کے کاروبار پر ریگولیٹری تعمیل کے بوجھ کو کم کرنے کے لئے مختلف محکموں کے ساتھ ہم آہنگی بھی کی ہے ۔
سنہا نے کہا ہم اقتصادی ترقی کے تحفظ اور فروغ کیلئے پُر عزم ہیں اور ’’ میک ان انڈیا ‘‘ اور مرکزی حکومت کے دیگر اقدامات کے ذریعے مواقع سے فائدہ اٹھانے کیلئے پُر عزم ہیں اور ان کاروباری تنظیموں کے ساتھ تجارتی تعلقات کیلئے کھلے ہیں جو تجارت کو بڑھانے کیلئے مستحکم ، قابل بھروسہ اور بھروسہ مند شراکت داروں کی تلاش میں ہیں ۔
لیفٹیننٹ گورنر نے کہا کہ جموں و کشمیر ایک وافر ڈیموگرافک ڈیویڈنڈ ، حکومت کے ساتھ حیرت انگیز طور پر آسان انٹر فیس ، مخصوص صنعتی لینڈ بینک ، سیکٹر کیلئے مخصوص پالیسی ، مسلسل بڑھتا ہوا عوامی بنیادی ڈھانچہ، کاروبار کرنے میں آسانی کو آگے بڑھانے والی اصلاحات ، ٹیکس کے بہت سے فوائد اور یو ٹی میں نئی سرمایہ کاری کی سہولت کیلئے اہم طور پر ایک محفوظ ماحول سب سے زیادہ پیش کرتا ہے ۔
سنہا نے کہا کہ میں جموں و کشمیر کی اقتصادی ترقی کے سفر میں کاروباری مندوبین کا خیر مقدم کرتا ہوں اور ایک زیادہ خوشحال اور متحرک یو ٹی بنانے کی طرف مل کر آگے بڑھنے کیلئے جس سے ہمارے معاشرے کے تمام طبقات کو فائدہ پہنچے گا ۔