سرینگر/۲۲ مارچ
سرینگر ضلع کے زونی مرعلاقے کے قریب عسکریت پسندوں کے ساتھ ’مختصر فائرنگ کے تبادلے‘ میں منگل کو شدید زخمی ہونے والا ایک پولیس اہلکار صورہ میڈیکل انسٹچوٹ میں زندگی کی جنگ لڑ رہا ہے۔
ایک اعلیٰ پولیس افسر نے بتایا کہ کانسٹیبل عامر حسین، جس کی گردن سمیت جسم کے اوپری حصوں پر گولیاں لگی ہیں، کی حالت تشویشناک ہے۔ افسر نے کہا’’پہلے ایسی اطلاعات تھیں جن میں ان کے انتقال کا ہوگیا ہے لیکن یہ واضح کیا گیا ہے کہ معلومات کنفیوڑن کی وجہ سے تھی‘‘۔ افسر نے مزید کہا’’ڈاکٹرز کے مطابق ان کی حالت بہت نازک ہے‘‘۔
انہوں نے کہا ’’بعض اوقات اس قسم کی الجھنیں ہو جاتی ہیں لیکن ان کی حالت بہت نازک ہے‘‘۔
اس سے قبل انہوں نے کہا کہ ایک مختصر فائرنگ کا تبادلہ ہوا جس میں ۳۰ سالہ پولیس اہلکار شدید طور پر زخمی ہوا۔ افسر نے بتایا کہ عسکریت پسند بھی زخمی ہوا اور ممکنہ طور پر موقع سے فرار ہو گیا۔
دریں اثنا، انہوں نے کہا کہ فرار ہونے والے عسکریت پسندوں کو پکڑنے کے لیے پورے علاقے کو گھیرے میں لے لیا گیا ہے۔
