جموں؍۱۹ستمبر
جموں و کشمیر پردیش کانگریس کمیٹی (جے کے پی سی سی) کے صدر طارق حمید قرہ نے ہفتے کے روز جموں میں پارٹی ہیڈکوارٹر کے باہر بی جے پی مخالف احتجاج کی قیادت کرتے ہوئے الزام عائد کیا کہ بی جے پی کی مقامی اکائی کی جانب سے لگائے گئے ایک پوسٹر میں کانگریس رہنما راہل گاندھی اور سماج وادی پارٹی کے سربراہ اکھلیش یادو کو عسکریت پسندی سے جوڑنے کی کوشش کی گئی ہے۔
یہ احتجاج جموں میں کانگریس کے جاری ’’چوپال پہ چرچا‘‘ عوامی رابطہ پروگرام کے دوران کیا گیا، جس کے ذریعے پارٹی ریاستی حیثیت کی بحالی، بے روزگاری، بھرتیوں سے متعلق مسائل، بڑھتی قیمتوں اور عوامی شکایات سمیت مختلف معاملات اٹھا رہی ہے۔
قرہ نے الزام لگایا کہ بی جے پی کی جموں و کشمیر اکائی نے راہل گاندھی اور اکھلیش یادو کے ساتھ ساتھ انڈیا اتحاد میں شامل جماعتوں کے رہنماؤں کی تصاویر آویزاں کیں اور ان کے نیچے مبینہ دہشت گردوں کی تصاویر لگائیں۔
انہوں نے شہر کے وسط میں واقع شہیدی چوک پارٹی ہیڈکوارٹر کے باہر احتجاج کی قیادت کرتے ہوئے نامہ نگاروں سے کہا کہ اس نمائش کا مقصد یہ تاثر پیدا کرنا تھا کہ راہل گاندھی، اکھلیش یادو اور کانگریس کا عسکریت پسندی سے تعلق ہے۔
جے کے پی سی سی کے ورکنگ صدر رمن بھلا سمیت کانگریس کے درجنوں کارکنوں اور سینئر رہنماؤں نے احتجاج میں شرکت کی اور بی جے پی اور مرکزی حکومت کے خلاف نعرے بلند کیے۔
قرہ نے کہا کہ بی جے پی کی یہ کارروائی یا تو کانگریس کے ’’چوپال پہ چرچا‘‘ پروگرام کی بڑھتی ہوئی مقبولیت کا ردعمل ہوسکتی ہے یا پھر عوام کی توجہ بڑے مسائل سے ہٹانے کی کوشش۔
جے کے پی سی سی صدر نے قوم پرستی سے متعلق بی جے پی کے دعوؤں کو بھی تنقید کا نشانہ بناتے ہوئے اس جماعت کی تاریخی حیثیت پر سوال اٹھایا۔ کرہ نے کہا، ’’بی جے پی جو ہمیں قوم پرستی کا سبق سکھانے کی کوشش کررہی ہے، اسے پہلے اپنے ماضی کو یاد کرنا چاہیے۔‘‘
۱۹۹۹ میں انڈین ایئرلائنز کے طیارے کے اغوا اور اس کے بعد گرفتار دہشت گردوں، جن میں کالعدم جیشِ محمد کے سربراہ مسعود اظہر بھی شامل تھے، کو افغانستان میں رہا کیے جانے کے واقعے کا حوالہ دیتے ہوئے کرہ نے الزام لگایا کہ اس وقت بی جے پی کی زیر قیادت حکومت نے بحران سے نمٹنے کے اپنے طریقۂ کار کے ذریعے ملک کو درپیش عسکریت پسندی کی صورتحال میں اضافہ کیا۔
قرہ نے کہا، ’’راہل گاندھی ایک ایسے خاندان سے تعلق رکھتے ہیں جس نے ملک کی سلامتی اور اتحاد کے لیے دو وزرائے اعظم کو اپنی جانیں قربان کرتے دیکھا ہے۔‘‘
کانگریس رہنما نے یہ بھی الزام لگایا کہ بی جے پی اور اس کے پیشروؤں کا بھارت کی تحریک آزادی میں کوئی قابلِ ذکر کردار نہیں تھا اور انہوں نے ان پر انگریزوں کا ساتھ دینے کا الزام عائد کیا۔
قرہ نے بی جے پی کو چیلنج کیا کہ وہ اپنی سیاسی روایت سے ایسے افراد کی نشاندہی کرے جنہوں نے، ان کے بقول، تحریک آزادی کے دوران اسی نوعیت کی قربانیاں دی ہوں۔
کانگریس رہنما نے بی جے پی سے وابستہ بعض شخصیات اور ان افراد کے مبینہ روابط کا بھی حوالہ دیا جنہیں انہوں نے عسکریت پسندی سے منسلک قرار دیا، جن میں الیاس خان اور طالب حسین شامل ہیں، جنہیں جموں و کشمیر میں سکیورٹی فورسز نے گرفتار کیا تھا۔
قرہ نے کہا، ’’اگر ہم اس بارے میں بات کرنا شروع کردیں تو معاملہ بہت دور تک جائے گا۔‘‘انہوں نے کہا کہ کانگریس جموں و کشمیر بھر میں بی جے پی کی مبینہ ’’نفرت کی سیاست‘‘ اور عوامی مسائل سے توجہ ہٹانے کی کوششوں کے خلاف اپنا احتجاج جاری رکھے گی۔ (ایجنسیاں)
۔۔۔۔۔(ایب ڈیسک)
